Aǵylshyn tilin úırenip, kókjıegimizdi keńeıtýimiz qajet - N.Nazarbaev
Kadr daıyndaý jáne bes ınstıtýtsıonaldyq reformalarǵa toqtala kele, Memleket basshysy qazir Qazaqstan mektepterinde úshtildilik belsendi engizilip jatqandyǵyn atap ótti.
«Bul - qazaq, orys jáne aǵylshyn tilderi. Bul joǵary synyptarda tolyqtaı aǵylshyn tilinde bilim alýǵa kóshýge negizdelgen. Keıin birtindep ýnıversıtetterde tabıǵı ǵylymǵa basa den qoıylady. Keleshekke osylaısha bet burdyq. Ózderińiz bilesizder, Qazaqstan «Bolashaq» baǵdarlamasy boıynsha shetelde jastardy 22 jyldan beri oqytyp keledi. 20 myńǵa jýyq adam shetelde bilim alyp, búginde ekonomıka salasynda eńbek etýde. Biz úshin bul erekshe jetistik!» - dedi N. Nazarbaev.
«Budan basqa, barlyq oblysta zııatkerlik mektepter ashyldy, onda úlken baıqaý arqyly daryndy balalar jınaqtalady. Nazarbaev ýnıversıteti avtonomdyq rejimde jumys istep jatyr. Onyń arnaıy zańnamasy bar. Barlyq professýra shetelden, tolyqtaı aǵylshyn tilinde oqytylady. 15 maýsymda alǵashqy túlekter bitirip shyǵady. Bul keremet daryndy balalar. Nazarbaev ýnıversıtetine túsýge 10 myń jas tilek bildirse, tek qatań súzgiden ótken 500-i ǵana qabyldanady», - dedi Memleket basshysy.
Prezıdenttiń aıtýynsha, aǵylshyn tili - kompıýter, álemdik ǵylym, mádenıet tili.
«Biz, qazaqtar, álemdik ǵylym men mádenıetke orys tili arqyly shyqtyq. Biraq qazir aǵylshyn tilin meńgerip, kókjıegimizdi keńeıte túsýimiz qajet», - dep sózin túıindedi N. Nazarbaev.
