Aǵylshyn tilin bilmeıtin oqytýshylarǵa eshkim qysym kórsetken joq - rektor Jaqypova
ASTANA. QazAqparat - QR Prezıdenti janyndaǵy Memlekettik basqarý akademııasynyń rektory Fatıma Jaqypova shet tilin bilmegeni úshin oqytýshylardy jumystan shyǵarý týraly aqparatty joqqa shyǵardy, dep xabarlaıdy QazAqparat tilshisi.
Akademııa basshysynyń aıtýynsha, magıstranttar men doktoranttar úshin ondaı talap qoıylady. Oqýǵa túsý úshin olar shet tilin bilýi tıis. Magıstratýraǵa, ıa bolmasa, doktorantýraǵa túsemin deıtinder ulttyq testileý ortalyǵynda synaq tapsyrady.
«Al akademııa qyzmetkerleri, sonyń ishinde professorlar men oqytýshylar úshin aǵylshyn tilin bilý sharty rekomendatsııa retinde kórsetilgen. Sondyqtan akademııada, ıa, bálkim basqa jerde, ustazdardy shet tilin bilmegeni úshin jumystan shyǵarý týraly aqparat shyndyqqa janaspaıdy. Sebebi mamandardy jumysqa qabyldaý sharalary bilim jáne ǵylym mınıstriniń 230-shy buıyryǵy boıynsha júrgizildi. Oǵan sáıkes, xabarlandyrý da, qujat qabyldaý da ashyq ótti. Sosyn konkýrstyq komıssııa boldy. Onyń quramyna Prezıdent Ákimshiligi, qarjy mınıstrliginiń jaýapty xatshysy, sondaı-aq qoǵamdyq uıymdardyń músheleri endi. Demek, biz jumysqa qabyldaýdy da, jumystan shyǵarýdy da ashyq júrgizip kelemiz», - dedi F.Jaqypova Astanada ótken baspasóz máslıxatynda.
Aıta keteıik, brıfıng barysynda rektor sybaılas jemqorlyq máselesine de toqtaldy. Onyń sózine qaraǵanda, memqyzmetshilerdiń ar-uıatyn áli de ushtaý qajet.
Budan bólek, eki-úsh jylda memlekettik apparat jumysynyń túbegeıli ózgeretinin jetkizdi.
