Aǵylshyn tili Eýroodaqtyń resmı tili bolyp qala bere me? - Álemdik baspasózge sholý
Taılandta qarýly sarbaz qolynan 26 adam qaza tapty - Bangkok Post
Taılandta qarýly sarbaz Nakhonratchasıma qalasynyń turǵyndaryna oq jaýdyryp, 26 adam qaza tapty. Sońǵy málimetterge qaraǵanda, 50-den astam adam jaraqat alǵan, dep habarlaıdy Bangkok Post .
Basylymnyń jazýynsha, sarbaz arnaıy operatsııa kezinde atyp óltirilgen.
«Qaqtyǵys jergilikti ýaqyt boıynsha túngi saǵat 3.30-da bastalǵan. Sarbaz aldymen óziniń komandıri men taǵy eki adamǵa oq jaýdyrǵan. Sonymen qatar áskerı lager aýmaǵynda 63 jastaǵy áıel men bir áskerı qyzmetker óltirilgen», - dep jazady basylym.
Oqıǵa ornyna Taılandtyń premer-mınıstri Praıýt Chan-Ocha bardy jáne mundaı jaǵdaı endi qaıtalanbaýy kerek ekenin aıtty.
Sarbaz Chakrapant Tomma saýda ortalyǵyna tyǵylmaq bolmaq. Polıtsııa ony sol jerde atyp óltirdi.
Sarbaz qaladaǵy birneshe obektide oq jaýdyrǵan. Sonymen qatar ol óziniń áreketin Facebook arqyly tikeleı efırde kórsetken.
Polıtsııanyń habarlaýynsha, arnaıy operatsııa kezinde júzdegen adam qutqarylyp, kepilge alynǵan 8 adam bosatyldy.
Brıtan ýnıversıtetteri oqý jylyn shegergen stýdentterge aqsha tólep jatyr - The Times
Brıtanııa ýnıversıttetteri oqý jylyn bir jylǵa shegergen stýdentterge myń dollardan astam qarajat tólemek. Mundaı sheshim ýnıversıtetterge tym kóp adam túskendikten qabyldanyp otyr, dep jazady The Times .
Basylymnyń jazýynsha, Ulybrıtanııadaǵy 24 elıtaly ýnıversıtet oqýǵa bos oryn sanynan da kóp adam qabyldaǵandyqtan oqý jylyn bir jylǵa shegergen stýdentterge aqsha tóleıtinin málimdegen.
Basylymnyń resmı saýalyna jaýap bergen ýnıversıttetterdiń biri medıtsına mamandyǵyna oqýǵa túsken 260 adamnyń árqaısysyna 2 myń dollardan astam qarajat usynyp, oqý jylyn shegerýdi suraǵanyn aıtqan. Al medbıke isi boıynsha oqýǵa túsken 59 abıtýrıentke myń dollardan usynylǵan. Degenmen, ýnıversıtetterdiń mundaı usynysyn qabyldap jatqandar az.
2018 jyly Manchester ýnıversıteti 190 adamǵa oqýdy keıinge shegerýi úshin myń dollardan astam aqsha tólemek bolǵan. Bıyl mundaı usynysty aıtqan ýnıversıtetter sany artyp otyr.
«Stýdentter ýnıversıtettiń adam qabyldaýǵa shyǵyndanyp, ǵylymı zertteý men oqýǵa az qarjy bólip jatqanyna narazy. Al stýdentterdiń ulttyq keńesi ýnıversıtetter stýdentti oqýǵa qabyldaǵan kezde ózderiniń resýrsy jetetinine kepildik berýi tıis ekenin aıtty», dep jazady basylym.
Nelikten aqshamyz kelesi jalaqyǵa deıin jetpeı qalady? - Le Figaro
Kópshiligimizde jalaqyǵa bir apta qalǵanda aqsha defıtsıti paıda bolady. Bul nelikten bolady? Oǵan kim kináli? Bıýdjettiń mundaı jaǵdaıyna ne áser etedi jáne muny qalaı ózgertýge bolady? Le Figaro osy suraqtarǵa jaýap izdedi.
«Bıýdjettiń mundaı haosy qarjylyq problemany emes, emotsıonaldy problemany kórsetedi. Bizdiń aqshany tabýymyz jáne jumsaýymyz oılaý qabiletimizge baılanysty», dep jazady avtor.
Onyń aıtýynsha, kez kelgen adamnyń aqshaǵa degen qarym-qatynasy - psıhologııalyq muranyń nátıjesi.
«Aqshaǵa kelgende ata-ananyń ómir súrý deńgeıin eskerý kerek. Olardyń qarjylyq áreketteri men tájirıbesi balaǵa mindetti túrde áser etedi», dep jazylǵan maqalada.
Avtorǵa sensek, adamdar baqylaýsyz shyǵynnyń kózi sanalatyn emotsııalardan arylmaı, eshteńe ózgermeıdi.
«Eń aldymen áreketterimizdiń tıpin anyqtaý kerek. Onyń tórt túri bar. Birinshisi - bank esepshottaryna qaramaıtyn, qarjysynyń jınalýyna múmkindik jasaıtyn, kvıtantsııalaryna qaramastan olardy laqtyryp jiberetin adam. Ekinshisi - materıaldyq nárseni mańyzdy sanamaıtyn monah. Ol bank esepshotynyń emes, óziniń adamı qasıetterine kóbirek alańdaıdy. Úshinshisi - oılanbaı saýda jasaıtyn, bir kúnmen ómir súretin adam. Tórtinshisi - ár shyǵynyn eseptep, kóbirek únemdep júrip aqsha jınaıtyn adam», dep jazady avtor.
Onyń aıtýynsha, osy tórt tıpti oryndy paıdalanyp, teń ustaýǵa umtylý kerek.
«Aı saıyn tabystyń 55 paıyzyn mindetti shyǵyndarǵa, 5-10 paıyzyn syılyq pen qaıyrymdylyqqa jumsaý kerek. 10 paıyzyn jınap, 5-10 paıyzyn bilimge, taǵy osynsha qarjyny kóńil kóterýge nemese demalysqa bólip qoıý kerek», dep jazady avtor.
Breksıtten keıin aǵylshyn tili Eýroodaqtyń resmı tili bolyp qala bere me? - Le Monde
Ulybrıtanııanyń Eýroodaqtan shyǵýy Eýroodaqta aǵylshyn tilinen góri frantsýz tiliniń basymdyǵyna alyp keledi, dep jazady Le Monde basylymy.
«Eýroodaq pen Eýrokomıssııada qujat aınalymynyń 90 paıyzy aǵylshyn tilinde júrgiziledi. Al Ulybrıtanııa Eýroodaqtan shyqqannan keıin bul jaǵdaı qalaı ózgeredi? Breksıtten keıin Eýroodaq azamattary sóıleıtin tilder tiziminde aǵylshyn tili 17-orynǵa túsip qalatynyn eskersek, bul jaǵdaı ózgerýsiz qalýy múmkin be?», dep jazady basylym.
Avtordyń aıtýynsha, aǵylshyn tili Eýroodaqtan múldem joǵalyp ketýi múmkin emes, sebebi bul úlken tártipsizdikke alyp keledi. Sonymen qatar Eýroodaqtyń tutastyǵy joıylyp, onyń basqa álemge ashyqtyǵy da joǵalady.
«Degenmen, tilder arasynda balans bolýy kerek. ıAǵnı, aǵylshyn tilinen múldem bas tartpaı, Eýroodaq halqynyń 130 mıllıony sóıleıtin frantsýz tiline de basymdyq berilýi tıis. Sonymen qatar Eýroodaqqa múshe 27 memlekettiń 19-y frantsýz tilin bilýdi qajet etetinin de eskergen jón», dep jazady avtor.
Onyń aıtýynsha, Eýroodaq sheneýnikterine óz týǵan tilinen bólek aǵylshyn jáne frantsýz tilin bilýdi mindetteýi kerek. Sonymen qatar resmı mátinderdi halyqtyń kópshiligi sóıleıtin tilde jarııalaý máselesin rettegen jón.
Eýropada aqshany turǵyn úıge emes, saıahatqa jumsaǵysy keletinder artty - Stern
15 memlekette júrgizilgen saýalnama nátıjesi kórsetkendeı, damyǵan batys elderiniń kóbinde adamdar turǵyn úı satyp alǵysy kelmeıdi. Onyń ornyna olar aqshasyn saıahatqa jumsaǵandy jón kóredi, dep jazady Stern jýrnaly.
Ipsos marketıngtik zertteýler ınstıtýty júrgizgen saýalnamaǵa 15 myń adam qatysqan.
«13 memlekettegi eýropalyqtardyń 70 paıyzy jer nemese úı satyp alýdyń qıyndap ketkenin aıtady. AQSh-ta respondentterdiń 59 paıyzynan astamy turǵyn úı satyp alýdyń qıyndyǵyn atap ótken. Aýstralııada bul kórsetkish - 75 paıyz», dep jazadts basylym.
Respondetter neshe jasqa kelgende turǵyn úı satyp alasyzdar degen suraqqa olardyń 43 paıyzy eshqashan úı almaıtynyn aıtyp jaýap bergen.
Saýalnamaǵa qatysqan adamdardyń kóbi jyljymaıtyn múlik alýǵa basymdyq bermeıdi. Kópshiligi turǵyn úı kerek ekenin aıtsa da, bul maqsatta aqsha jınamaıtynyn aıtqan. Olar munyń ornyna aqshany saıahatqa, súıikti isine, oqýǵa jumsaýdy jón kóretinin atap ótken.
«Eýropalyqtardyń 54 paıyzy aqshany turǵyn úıge emes, saıahatqa jumsaǵandy jón kóredi», dep jazady avtor.
