Aǵylshyn fýtbol klýbtary koronavırýs saldarynan 1,3 mlrd eýrodan aıyrylmaq
NUR-SULTAN. QazAqparat – Anglııa premer-lıgasynyń (APL) fýtbol klýbtary koronavırýsqa baılanysty osy maýsymdaǵy oıyndaryn ótkize almaǵan jaǵdaıda 1,3 mlrd eýroǵa jýyq qarjydan qaǵylady, dep habarlaıdy QazAqparat The Telegraph gazetine silteme jasap.
Senbi kúni APL basshylyǵy klýb oıynshylarynyń jalaqylaryn 30% qysqartý maqsatynda olarmen beınekonferentsııa ótkizdi. Sondaı-aq fýtbolshylarǵa klýbtyń bolýy múmkin qarjylyq shyǵyndary týraly aıtty. Koronavırýs pandemııasyna baılanysty Anglııa chempıonaty belgisiz merzimge toqtatylatyn boldy, eger maýsym aıaǵyna deıin júrgizilmese, onda klýbtar teledıdar arqyly taratý quqyǵynan (shamamen €866 mln), matchtar ótkizýden (shamamen €227 mln) jáne demeýshilik kelisimsharttardan túsetin (shamamen €199 mln) kiristerden qaǵylatyn bolady.
