Aǵybaı batyr kóshesiniń bóliginde birjaqty kólik qozǵalysy engiziledi

ASTANA. QazAqparat - 20 tamyzda elordada Bókeıhan jáne Aǵybaı batyr kóshelerinde (Abaı dańǵylynan Respýblıka dańǵylyna deıin) birjaqty qozǵalys jobasynyń úshinshi kezeńin júzege asyrý josparlanǵan, onyń uzyndyǵy 0,99 km quraıdy, dep habarlady qala ákiminiń resmı saıty.

Bul Respýblıka dańǵyly men Áýezov kóshesiniń arasyndaǵy Abaı dańǵylynyń bir bóligine túsetin júktemeni azaıtýǵa múmkindik beredi. Bul týraly elordanyń kólik ınfraqurylymyn damytý máselesi jónindegi qoǵamdyq tyńdaý barysynda «Astana LRT» JShS basqarma tóraǵasy Talǵat Ardan málim etti.

Onyń atap ótýinshe, bir jaqty qozǵalys jobasy qalanyń kóshe-jol jelisine túsetin júktemeni azaıtý jónindegi keshendi is-sharalar jospary elementteriniń biri bolyp tabylady.

Jobanyń alǵashqy eki kezeńi 28 mamyrda jáne 10 maýsymda iske asyryldy. Birjaqty qozǵalys Áýezov kóshesinde (Respýblıka dańǵylynan Moldaǵulova kóshesine deıin), Jeltoqsan kóshesinde (Máskeý kóshesinen Kenesary kóshesine deıin), Abaı dańǵylynda (Saryarqa dańǵylynan Pýshkın kóshesine deıin), Kenesary kóshesinde (Pýshkın kóshesinen Saryarqa dańǵylyna deıin), ıAnýshkevıch kóshesinde (Abaı dańǵylynan Imanov kóshesine deıin) engizildi. Kóshe-jol jelisiniń jaǵdaıyna kúndelikti monıtorıng júrgizilip, kólik dálizderine túsetin júkteme deńgeıi anyqtalady.

- Eki joba engizilgennen keıin monıtorıng negizinde qozǵalystyń ortasha jyldamdyǵy 30%-ǵa deıin ósti. Qıylystarda kidirý ýaqyty 78-den 40 sekýndqa deıin qysqardy, al kólik quraldarynyń jıiligi 20%-ǵa ulǵaıdy, - dedi Talǵat Ardan.