Agrojoba: Jambylda 60 mln jumyrtqa óndiretin kásiporyn boı kóteredi
ASTANA. KAZINFORM — Jambyl oblysynda asyl tuqymdy qus sharýashylyǵyna baǵyttalǵan ІІ sanattaǵy óndiris ornynyń irgetasyna kapsýla salý rásimi ótti. Turar Rysqulov aýdany Qaraqystaq aýylynda júzege asatyn kásiporynnyń jalpy quny – 3,5 mlrd teńge. Bul týraly OKQ málim etti.
Joba eki kezeńmen júzege asyrylady: alǵashqy kezeńde jylyna 10 mln ınkýbatsııalyq jumyrtqa óndirý josparlansa, ekinshi kezeńde óndiris qýattylyǵy 60 mln danaǵa deıin ulǵaıtylmaq.
Oblys ákimi Erbol Qarashókeev óz sózinde Memleket basshysynyń tapsyrmasyna sáıkes agrarlyq sektordy damytý, ishki naryqty otandyq ónimmen tolyqtyrý jáne ımportqa táýeldilikti azaıtý negizgi basymdyqtardyń biri ekenin atap ótti. Bul baǵytta asyl tuqymdy qus sharýashylyǵy reprodýktorynyń mańyzy erekshe.
— Áýlıeata óńiri — aýyl sharýashylyǵy salasynda qalyptasqan dástúri bar, eldiń azyq-túlik qaýipsizdigin qamtamasyz etýge eleýli úles qosyp kele jatqan aımaq. Búginde biz óndiris kólemin arttyrýmen qatar, salanyń tıimdiligi men básekege qabilettiligin kúsheıtýge basymdyq berip otyrmyz. Qus sharýashylyǵy — strategııalyq mańyzy joǵary baǵyttardyń biri. Bul sala halyqty qoljetimdi ári sapaly aqýyz kózimen qamtyp qana qoımaı, agroónerkásip keshenin ártaraptandyrýda mańyzdy ról atqarady. Atalǵan jobanyń iske asýy óńirdi sapaly tuqymdyq materıalmen qamtamasyz etip, qus sharýashylyǵynyń tolyq óndiristik tizbegin qalyptastyrýǵa múmkindik beredi. Bul óz kezeginde ónimniń ózindik qunyn tómendetip, óndiris kólemin ulǵaıtýǵa jáne salanyń turaqty damýyna jol ashady, — dedi aımaq basshysy.
Qazirgi tańda qus sharýashylyǵynda tuqymdyq shıkizattyń 80%-y shetelden ımporttalady. Jańa kásiporyn osy olqylyqtyń ornyn toltyryp, óndiriletin ınkýbatsııalyq jumyrtqalar otandyq qus fabrıkalary men sharýashylyqtardy qamtamasyz etýge ári eksportqa shyǵarýǵa baǵyttalady.
Qurylys barysynda 120 adam jumyspen qamtylsa, óndiris oshaǵy paıdalanýǵa berilgennen keıin 80-100 jańa jumys orny ashylady. Onyń 60-70%-y jergilikti turǵyndarǵa tıesili bolmaq. Jobany 2027 jyldyń birinshi toqsanynda iske qosý josparlanyp otyr.
Jambyl oblysynyń ınvestıtsııalyq qorjynynda jalpy quny 5,9 trln teńgeni quraıtyn 116 joba bar. Ótken jyly 21 joba júzege asyrylyp, 550 jańa jumys orny ashyldy. Al bıyl jalpy quny 471 mlrd teńgeni quraıtyn 47 jobany iske qosý kózdelgen.
Buǵan deıin Taldyqorǵanda taýyq jumyrtqasy qaptamada kórsetilgen salmaqqa sáıkes bolmaı shyqqanyn jazdyq.
