Agrosektordy tsıfrlandyrý: Elde 300-den asa qojalyq smart-tehnologııalardy engizdi
ASTANA. KAZINFORM — Qazaqstannyń 300-den astam aýyl sharýashylyǵy qojalyǵy qazirdiń ózinde «aqyldy ferma» elementterin paıdalanady, dep habarlaıdy Kazinform tilshisi.
Bul týraly Aýyl sharýashylyǵy vıtse-mınıstri Ermek Kenjehanuly Astanada ótken Ortalyq Azııanyń KazAgro/KazFarm-2025 iri aýyl sharýashylyǵy kórmesiniń ashylýynda málimdedi. Vıtse-mınıstrdiń aıtýynsha, Qazaqstan agrosektordy tsıfrlandyrý jolynda aıtarlyqtaı kúsh salyp jatyr.
— Elimizde 300-den astam sharýa qojalyǵy smart-ferma elementin engizdi. Biz jasandy ıntellekt jáne «aqyldy jer ıgerý» (jer ıgerýde GPS, spýtnık beınelerin jáne drondy qoldaný — red.) tehnologııalaryn engizip jatyrmyz. Olardyń tıimdili joǵary jáne túsetin taza paıdasy áldeqaıda joǵary. Memleket jáne Úkimet retinde biz osy tehnologııalardy aýyl sharýashylyǵyna tereńdete engizý sharalaryn ári qaraı yntalandyrýǵa daıynbyz, — dedi ol.
Vıtse-mınıstr bıylǵy kórmeniń bas taqyryby aýyl sharýashylyǵyn tsıfrlandyrý jáne agrarlyq salaǵa jasandy ıntellektini engizý ekenin atap ótti.
— Tsıfrlandyrý — agrarlyq sektordyń tıimdiligin arttyrýdyń negizgi faktorlarynyń biri. Bul aýyl sharýashylyǵyn damytýdyń mańyzdy jáne perspektıvti baǵyty, — dedi ol.
25 elden ákelingen tehnologııalar
KazAgro/KazFarm-2025 kórmesine Germanııa, Chehııa, Aýstrııa, Belarýs, Iran, Reseı jáne Qytaı sekildi 25 elden 300-den astam kompanııa keldi. Qatysýshylar eginshilikke arnalǵan drondar men ónimdilikti baqylaýdyń tsıfrlyq júıelerinen bastap, robot tehnıkasy men ıntellektýaldy fermalardy basqarý júıelerine deıingi sońǵy jetistikterdi usyndy.
— Qazaqstannyń agrarlyq bolashaǵy jas ınjenerlerdiń, bıotehnologter men baǵdarlamashylardyń qolynda. Bizdiń mindetimiz — aǵa býyn mamandardyń tájirıbesi men jastardyń energııasyn bir alańda biriktirý, — dedi ExpoGroup halyqaralyq kórme kompanııasynyń dırektory Sholpan Qojabaeva.
Onyń aıtýynsha, bıylǵy 300 kompanııanyń 90-y bul kórmege alǵash ret qatysyp otyr. Olardyń bári — salanyń jetekshi oıynshylary eken.
Halyqaralyq kommýnıkatsııalyq alań
Kórme Astanadaǵy EXPO halyqaralyq kórme ortalyǵynda ótip jatyr. Uıymdastyrýshylar atap ótkendeı, bul shara agrarlyq salada tájirıbe almasýshylar úshin eń iri alańǵa aınalǵan. Sheteldik delegatsııalar, elshilikter men halyqaralyq uıymdardyń ókilderi qatysýy sharaǵa halyqaralyq kommýnıkatsııalyq platforma mártebesin berip tur.
AgroHackathon jáne iskerlik baǵdarlama
Іs-shara aıasynda salalyq konferentsııalar, paneldik pikirtalastar, semınarlar, sondaı-aq halyqaralyq sarapshylarmen B2B jáne B2G formatta kezdesýler ótedi.
Negizgi taqyryptar:
• agrarlyq bilim berýdiń jańa tásilderi;
• Chehııa men Germanııa tájirıbesindegi ınnovatsııalar;
• klımattyq ózgerister jaǵdaıyndaǵy jem-shóp óndirisi;
• mal sharýashylyǵyn tsıfrlandyrý jáne avtomattandyrý;
• veterınarııa jáne bıologııalyq qaýipsizdik máseleleri.
Bıyl jas mamandardy jumysqa tartýǵa erekshe kóńil bólindi. Agrarlyq joǵary oqý oryndarynyń stýdentteri hakatonǵa qatysyp, «aqyldy» eginshilik, bıotehnologııa jáne ónimdiliktiń tsıfrlyq monıtorıngi salasyndaǵy startaptardy usynatyn bolady. Al úzdik ıdeıalar naqty ekonomıkaǵa engizý úshin sarapshylar men ınvestorlardyń qoldaýyna ıe bolady.
Jańa eksport
QazTrade saýda saıasatyn damytý ortalyǵy qazaqstandyq fermerler sheteldik seriktestermen kezdesip, eksporttyq kelisimder jasasatyn mamandandyrylǵan aımaq uıymdastyrdy. Bul «Qazaqstanda jasalǵan» brendiniń syrtqy naryqtardaǵy pozıtsııasyn nyǵaıtýǵa múmkindik beredi.
Kórmeler tuqym, agrohımııa jáne tehnıkadan bastap genetıka, jemshóp óndirisi men ónimdi qaıta óńdeýge deıingi agroónerkásip óndirisiniń búkil tsıklin qamtıdy.
Buǵan deıin, Qazaqstanda jyl basynan beri aýyl sharýashylyǵy ónimderi 4,4% óskenin habarlaǵan edik.
Kamıla Múlik