Agrosalada Qazaqstannan Tájikstanǵa eksport artyp keledi

ASTANA. QazAqparat – Qazaqstannan Tájikstanǵa astyq, maı jáne et ónimderiniń eksporty artyp keledi. Bul týraly QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«2022 jyldyń qorytyndysy boıynsha Qazaqstan men Tájikstan arasynda agroónerkásip kesheni salasynda taýar aınalymy 38 paıyzǵa artty. Osy oraıda bul saladaǵy taýar aınalymy 578 mln AQSh dollaryn qurap, onyń 400 mln dollardan astamy Qazaqstan eksportyna tıesili», - dedi E. Qarashókeev elordadaǵy Qazaqstan-Tájikstan bıznes-forýmynda tilshiler suraǵyna jaýap bere otyryp.

Onyń aıtýynsha, atalǵan elge dástúrli túrde astyq eksporttalyp jatyr. Sonymen qatar, Tájikstanǵa shujyq ónimderi, balmuzdaq, maı jáne et ónimderin jetkizý kólemi artty.

«Jalpy, eksport qurylymynda óńdelgen ónimniń úlesi ósip otyr. Atap aıtqanda, bıyl osy saladaǵy taýar aınalymynda oń kórsetkishter bolady degen jospar bar. Erteń elimizge Tájikstan Prezıdenti Emomalı Rahmon saparmen keledi. Bul turǵyda agroónerkásip kesheni salasyndaǵy yntymaqtastyqty keńeıtý baǵytanda jol kartasyna qol qoıylmaq», - dedi mınıstr.

Onyń sózine qaraǵanda, Tájikstannan jemis-jıdek, kókónis ımporttalyp jatyr.