Agrosaqtandyrý: fermerler úshin saqtandyrý polısiniń 80%-y sýbsıdııalanady
ASTANA.KAZINFORM — Qazaqstanda egin jınaý naýqany kezeńinde dándi jáne maıly daqyldardy topyraqtyń shamadan tys ylǵaldanýy táýekelinen saqtandyrýǵa ótinim qabyldaý jalǵasyp jatyr. Bul týraly AShM málim etti.
Saqtandyrý shartyn jasasýǵa ótinimdi bıylǵy jyldyń 30 maýsymyna deıin Kezekte.kz platformasy arqyly berýge bolady.
Saqtandyrý Abaı, Ulytaý, Aqmola, Aqtóbe, Atyraý, Shyǵys Qazaqstan, Batys Qazaqstan, Qaraǵandy, Qostanaı, Pavlodar jáne Soltústik Qazaqstan oblystarynyń fermerlerine qoljetimdi.
2026 jylǵy 15 tamyzdan 14 qazanǵa deıingi aralyqty qamtıdy jáne egin jınaý kezinde topyraqtyń shamadan tys ylǵaldanýyna baılanysty táýekelderdi óteýge baǵyttalǵan.
— Ótinim berýden bastap saqtandyrý shartyn jasasýǵa jáne saqtandyrý tólemin alýǵa deıingi barlyq rásimder Kezekte.kz platformasynda ornalastyrylǵan Qalqan agrosaqtandyrý aqparattyq júıesi arqyly elektrondyq formatta júzege asyrylady. Baǵdarlamaǵa qatysý úshin elektrondyq tsıfrlyq qoltańbanyń (ETsQ) bolýy qajet, — delingen habarlamada.
Memlekettik sýbsıdııalaý tetiginiń arqasynda agrarshylar úshin saqtandyrý polısiniń quny 80%-ǵa tómendetilgen. Osylaısha, fermer saqtandyrýdyń tolyq qunynyń nebári 20%-yn ǵana tóleıdi.
Aıta keteıik, «Jaılaý» baǵdarlamasy arqyly mal sharýashylyǵy jobalaryna jeńildetilgen nesıe beriledi.
