Almasbek Sadyrbaı: Sharýa men ǵylymdy ushtastyrýdyń tıimdi joly — Agropark qurý

ASTANA. KAZINFORM – Aýyl sharýashylyǵy salasyn ǵylymsyz damytý múmkin emes. Shekarasy shaǵyn, jeri az, topyraq qunarlyǵy tómen, resýrsy shekteýli elder ǵylym arqyly joǵary ónimge qol jetkizip otyr. Osy rette, otandyq ǵylymdy jandandyrý — basty nazarda. 

Bul másele Astana qalasynda ótip jatqan «Azyq-túlik qaýipsizdigi» atty qazaq sharýalarynyń quryltaıynyń sektsııalyq otyrysynda kóterildi.

«Sharýa men ǵylymdy ushtastyrý mańyzdy. Onyń tıimdi joly — Agropark qurý. Onda ǵalymdar zertteý jumystaryn júrgizip, eńbegin basynan sońyna deıin baqylaı alady. Áıtpese, qazir aıdaladaǵy bir sharýa qojalyqqa baryp, zerteýlerin shala-sharpy júrgizýge májbúr. Budan bólek, Agroparkte sharýalarǵa qajetti bar dúnıe qamtylady. Tamshylatý ádisimen ósken ósimdik qandaı bolatynyna, aryqtan sý jiberý nemese jaı sýarý arqyly ósirgen ósimdik qalaı bolatynyna kóz jetkize alady. Zamanaýı aýyl sharýashylyǵy tehnıkalarymen tanysýǵa múmkindik bar. Bul jerde balalarǵa, stýdentterge tanymdyq dúnıeler uıymdastyrylady. Olar qyzanaq sııaqty kókónisterdiń qalaı ósetininen habardar bolyp, tórt túlik ósirýdiń qyr-syryn úırenedi. Balany tárbıeleý, ilimin arttyrý, agrotýrızmdi damytý degen osy emes pe?» - deıdi «Shopan ata» ulttyq agro-qozǵalysynyń tóraǵasy Almasbek Sadyrbaı.

Sarapshynyń aıtýynsha, Ońtústik Koreıada ár aýdan ortalyǵynda agropark bar eken.

«Biz sońǵy eki jylda bul baǵytta jumys istep, Jetisý oblysy Úshtóbe qalasynan 7 km jerde agropark saldyq. Astana qalasy mańynan da salynyp jatyr. Jýyrda Jambyl oblysynyń ákimdigi de agropark salýǵa nıetti ekenin aıtty. Qazir jarnamasy jer jaratyn sheteldik tehnıka, tuqym, preparattar qaptap ketti. Tıimdiligi baıqalmaı, aqshasy jelge ushqan sharýalar az emes. Biz Agroparkte kez kelgen dúnıeni tájirıbeden ótkizip, tıimdiligine kóz jetkizgennen keıin ǵana sharýalarǵa usynatyn bolamyz», - deıdi A.Sadyrbaı.