Agroónerkásiptik serpin: 5 mlrd teńgelik joba iske qosyldy

ASTANA. KAZINFORM — Qazaqstanda iri mal bordaqylaý alańdaryn shoǵyrlandyrý arqyly agroındýstrııalyq klaster qurý jobasy iske asyrylyp jatyr. 

Túrkistan oblysynyń Saýran aýdanynda iri mal bordaqylaý alańdary shoǵyrlanǵan agroındýstrııalyq klaster qurýǵa baǵyttalǵan aýqymdy ınvestıtsııalyq joba iske qosyldy.

Jobanyń basty ereksheligi – 185 gektar aýmaqta 292 bordaqylaý alańyn shoǵyrlandyrý. Bul ınfraqurylymdy tıimdi paıdalanýǵa, shyǵyndardy ońtaılandyrýǵa jáne óndiristi ortalyqtandyrýǵa múmkindik beredi. Sharýashylyqtarda 15 myń bas iri qara mal bordaqylaý josparlanyp otyr.

Joba aıasynda mal sharýashylyǵy ónimderin óńdeýdiń tolyq óndiristik tsıklin qurý kózdelgen. Osy maqsatta 1,5 gektar jer telimi bólinip, onda zamanaýı soıý pýnkti salynady. Bul et ónimderin alǵashqy óńdeý, saqtaý jáne tasymaldaý boıynsha joǵary talaptarǵa saı qajetti ınfraqurylymmen qamtamasyz etedi.

Jobanyń jalpy ınvestıtsııa kólemi 5 mlrd teńge. Qarajattyń negizgi bóligi qurylys-montaj jumystaryna, ınjenerlik kommýnıkatsııalardy tartýǵa jáne jem-shóp bazasyn qalyptastyrýǵa baǵyttalady.

Jobanyń basty artyqshylyqtary – bordaqylaý sharýashylyqtaryn shoǵyrlandyrý arqyly óndiristik protsesterdi ońtaılandyrý, logıstıka men basqarýdy jeńildetý, sondaı-aq veterınarlyq jáne sanıtarlyq baqylaýdy ortalyqtandyrý.

Jobany iske asyrý óńirde etti mal sharýashylyǵyn damytýdy jedeldetip, ishki naryqty sapaly otandyq ónimmen qamtamasyz etýge jáne Qazaqstannyń eksporttyq áleýetin arttyrýǵa múmkindik beredi.