Agroónerkásip keshenin ınvestıtsııalaý Qazaqstannyń qus etine qajettiligin 2 jylda jabýǵa múmkindik beredi
ASTANA. KAZINFORM – Úkimette vıtse-premer Serik Jumanǵarınniń tóraǵalyǵymen ótken keńeste agroónerkásiptik keshenge tartylǵan ınvestıtsııalyq jobalardyń júzege asyrylý barysy qaraldy.
Búgingi tańda 446,9 mlrd teńge somaǵa 91 ınvestjobanyń jalpy pýly qalyptastyryldy. Basym baǵyttar – et, sút, astyq óńdeý jáne jylyjaı sharýashylyǵyn damytý.
Aýyl sharýashylyǵy vıtse-mınıstri Amanǵalı Berdalınniń aıtýynsha, «Agrarlyq nesıe korporatsııasy» arqyly 81,6 mlrd teńgeni quraıtyn 43 joba boıynsha belsendi jumystar atqarylýda. Atap aıtqanda, Aqtaý qalasyndaǵy et kombınatynyń qurylysyna 800 mln teńge kóleminde qarjy bólindi. Taǵy 4 joba jalpy somasy 1,7 mlrd teńgege ishinara qarjylandyryldy. Qalǵan jobalar boıynsha qujattar jınalýda.
Qazaqstannyń Damý banki arqyly 285 mlrd teńgeni quraıtyn 14 jobany qarjylandyrý ázirge bastalǵan joq. Bul rette QDB-nyń qus sharýashylyǵy basseıni qus fabrıkalarynyń qýatyn keńeıtý boıynsha 4 iri jobany qamtıdy, bul jobalar jalpy alǵanda elimizge jylyna 200 myń tonnaǵa jýyq qosymsha taýyq etin beredi. Atap aıtqanda, Almaty oblysyndaǵy «Prıma qus» JShS (3 kezeń jylyna 35 myń tonna), Almaty oblysyndaǵy «AITAS KZ» AQ jylyna 120 myń tonna, Jambyl qalasyndaǵy «Alel Agro» AQ 25 myń tonna jáne Aqmoladaǵy «Canadian Chicken Limited» jeke kompanııasy jylyna 12,5 myń tonna óndirmek. Bul jobalardy iske asyrý merzimi 2025-2026 jyldarǵa josparlanǵan.
Qazaqstanda qus etin óndirýdiń jalpy kólemi jylyna 328 myń tonna bolsa, qosymsha 200 myń tonna elge osy ónimge ımporttyq táýeldilikten qutylyp, eksportqa shyǵýǵa múmkindik beredi.
Halyk Bank-te jalpy somasy 78,5 mlrd teńge bolatyn 34 jobanyń pýly bar. Qazirdiń ózinde 1,4 mlrd teńgege 3 joba qarjylandyrylǵan. Quny 11 mlrd teńge bolatyn taǵy 5 joba maquldandy. Qalǵandary boıynsha qujattar jınalýda.
Budan bólek, keńeste aýstralııalyq ádispen mal sharýashylyǵyn damytý boıynsha jobalar qaraldy. Búgingi tańda 41 joba pýly qalyptasty. Olardy bıyl iske qosý úshin 48,6 mlrd teńge kóleminde qarjylandyrý qajet, onyń 6,9 mlrd teńgesi mal azyqtyq daqyldardy sýarý jobalaryna baǵyttalady.
