Agroónerkásipte transulttyq kompanııalardyń qatysýymen 7 joba júzege asýda
ASTANA. KAZINFORM — Memleket basshysynyń agroónerkásip kesheni salasyna transulttyq kompanııalardy tartý tapsyrmasyn oryndaý maqsatynda Aýyl sharýashylyǵy mınıstrligi «Kazakh Invest» UK» AQ-men birlesip, sheteldik ınvestorlardyń qatysýymen jalpy quny $3,8 mlrd bolatyn 55 jobaǵa qoldaý kórsetip otyr.
Úkimette Premer-Mınıstrdiń orynbasary Serik Jumanǵarınniń tóraǵalyǵymen ótken keńeste jahandyq, transulttyq kompanııalar qatysyp jatqan jeti jobanyń iske asyrylý barysy talqylandy.
Atalǵan jobalar arasynda mynadaı kásiporyndar bar:
- «INOKS Capital» shveıtsarııalyq kompanııasymen Almaty oblysynda jemis-jıdek óńdeý zaýytyn qurý jáne jemis-jıdek óńdeý zaýytyn salý;
- $160 mln ınvestıtsııasy bar «PepsiCo» kompanııasymen Almaty oblysynda tuzdy taǵamdar óndirý zaýytyn salý;
- QazBioPharm holdıngi men frantsýz Boehringer Ingelheim Animal Health kompanııasy arasyndaǵy yntymaqtastyqta Jambyl oblysynda aýsylǵa qarsy vaktsına óndirý;
- Shymkent qalasyndaǵy «Coca-Cola Almaty Bottlers» BK JShS alkogolsiz sýsyndar óndirisi;
- Ereımentaý aýdanynyń aýmaǵynda quny $132 mln bolatyn ıspandyq BigFarm konsortsıýmynyń qatysýymen Aqmola oblysynda ıntegratsııalanǵan mal sharýashylyǵy kesheniniń qurylysy;
- Almaty oblysynda CITIC Construction kompanııasynyń astyqty tereń óńdeý zaýytyn salý;
- Almaty oblysynda «Mareven Fýd» kompanııasynyń alkogolsiz sýsyndar óndirisi.
Keńeste memlekettik organdar tarapynan kómek kórsetýdi qajet etetin máseleler qaraldy.
Vıtse-premer aýyl sharýashylyǵy mınıstrligine jergilikti atqarýshy organdarmen jáne syrtqy ister mınıstrligimen birlesip jobalardy iske asyrýdy qoldaý jáne AÓK salasyna basqa da transulttyq kompanııalardy tartý jónindegi jumysty jandandyrýdy tapsyrdy.
