Agroónerkásip kesheninde quny 3,3 trln teńge bolatyn 677 joba iske asyrylady

ASTANA. KAZINFORM – 2027 jylǵa deıin aýyl sharýashylyǵy salasynda jalpy quny 3,3 trln teńgeni quraıtyn 677 ınvestıtsııalyq joba iske asyrylady. Bul týraly Aýyl sharýashylyǵy vıtse-mınıstri Erbol Tasjúrekov aıtty.

- Azyq-túlik taýarlarymen ózimizdi is júzinde tolyq qamtamasyz etip otyrmyz – negizgi taýar sanattary boıynsha ózin-ózi qamtamasyz etý deńgeıi 80-nen 100 paıyz jáne odan da joǵary kórsetkishke jetip otyr. Et, sút, jumyrtqa, kókónister, un – munyń bári ishki naryqtyń qajettilikterin qanaǵattandyrý úshin jetkilikti kólemde óndiriledi. Ózderińizge belgili, ótken jyly AÓK-de óńdelgen ónimniń úlesin arttyrýǵa baǵyttalǵan 2024–2028 jyldarǵa arnalǵan Aýyl sharýashylyǵy ónimderin óńdeýdi damytý jónindegi keshendi jospar qabyldandy. Osylaısha, ótken jyldan bastap alǵash ret óńdeýshi kásiporyndardyń aınalym qarajatyn tolyqtyrý úshin jyldyq taza 5 paıyz mólsherlememen jeńildetilgen qarjylandyrý kózdelip otyr. Sonymen qatar, ótken jyly 35 mıllıard teńge baǵyttaldy. Bıyl qarjylandyrý kólemi 40 mıllıard teńgeden asty, - dedi ol Ortalyq kommýnkatsııalar qyzmetindegi brıfıngte.

Vıtse-mınıstrdiń aıtýynsha, qabyldanyp jatqan sharalardyń nátıjesinde 2024 jyldyń qorytyndysy boıynsha óndiriste oń dınamıka baıqalady. Máselen, qus eti óndirisi 358,7 myń tonnany qurap, 6,8 paıyzǵa artty. Shujyq ónimderi óndirisi 4,8 paıyzǵa ósip, 71,9 myń tonnany qurady. Balyq jáne balyq ónimderi 65,2 myń tonna kóleminde óndirildi. Bul 2023 jylǵy deńgeıden 9,5 paıyzǵa artyq. Іrimshik pen súzbe óndirisi 48,2 myń tonnaǵa jetip, bir jyl ishinde 7,4 paıyzǵa ósti. Qyzylsha qantynyń óndirisi 2023 jylmen salystyrǵanda 62 paıyzǵa ulǵaıdy.

- Alaıda birqatar taýar boıynsha ımportqa táýeldilik saqtalýda. Olar: qus eti, shujyq ónimderi, balyq, syr men irimshik, qant. Biz bul máseleni kórip otyrmyz jáne ony sheshý baǵytynda belsendi jumys júrgizýdemiz – jeńildetilgen qarjylandyrý usyna otyryp, sút-taýarly fermalaryn, qaıta óńdeý kásiporyndaryn, qus fabrıkalaryn salý boıynsha ınvestıtsııalyq jobalardy iske asyrýdamyz. 2027 jylǵa deıin jalpy quny 3,3 trln teńgeni quraıtyn 677 ınvestıtsııalyq jobany iske asyrý josparlanyp otyr. Onyń ishinde 915 mlrd teńgege 197 joba ımportty almastyrýǵa baǵyttalǵan, - dedi Erbol Tasjúrekov.

Aıta keteıik, elimizde mal sharýashylyǵyna arnalǵan jańa nesıe baǵdarlamasy iske qosylady.