Aýyl sharýashylyǵy salasynda eki aqparattyq júıe ázirlenip jatyr
ASTANA. KAZINFORM — Aýyl sharýashylyǵy mınıstri Aıdarbek Saparov agroónerkásip keshenin tsıfrlandyrý máseleleri boıynsha keńes ótkizip, jaýapty qurylymdarǵa mal jáne ósimdik sharýashylyǵynda tolyq baqylaý júıesin qamtamasyz etýge kúsh salýdy tapsyrdy. Bul týraly vedomstvonyń baspasóz qyzmeti jarııalady.
Mınıstr Prezıdent tapsyrmasyna sáıkes 2026 jyl Tsıfrlandyrý jáne jasandy ıntellekt jyly bolyp jarııalanǵanyn alǵa tarta otyryp, bul baǵyt agrarlyq salanyń tıimdiligi men ashyqtyǵyn arttyrý, zamanaýı tehnologııalardy engizýdi jedeldetý, ónim sapasyn jaqsartý jáne eksporttyq áleýetti kúsheıtý úshin asa mańyzdy ekenin atap ótti.
— Aýyl sharýashylyǵy salasynda tórt negizgi aqparattyq júıe jumys isteıdi. Olardyń qatarynda birneshe bólimnen turatyn janýarlardy sáıkestendirý júıesi jáne eksport-ımport operatsııalaryn tirkeý júıesi bar. Bul rette ásirese, sýbsıdııalaý júıesi turaqty ári kidirissiz jumys istep tur. Qazirgi ýaqytta taǵy eki aqparattyq júıe ázirlenip jatyr. Osy baǵyttaǵy barlyq jumys belgilengen merzimde tolyq aıaqtalýy tıis, — dedi mınıstr.
Mınıstrlik salalyq júıelerdi tolyq biriktirip, tıimdi derekter almasýdy qamtamasyz etetin biryńǵaı agrarlyq tsıfrlyq platformany qurý jumystaryn jalǵastyryp otyr.
Mal sharýashylyǵy salasynda derekterdiń durystyǵyn qamtamasyz etýge, tolyq baqylaý júıesin qalyptastyrýǵa basa kóńil bólinedi. Osy maqsatta qoldanystaǵy júıeler jańǵyrtylyp jatyr. Onyń ishinde «VetBez»(veterınarııalyq qaýipsizdik) júıesi de bar. Sonymen qatar, aýyl sharýashylyǵy janýarlaryn sáıkestendirý júıesi aqparattyq qaýipsizdik talaptaryna saı jetildirilip, keıin biryńǵaı platformaǵa biriktiriledi.
Ósimdik sharýashylyǵynda tuqym men tyńaıtqyshtan bastap, daıyn ónimdi ótkizýge deıingi barlyq kezeńdi qamtıtyn baqylaý júıesi qalyptastyrylyp jatyr. Bul ashyqtyqty qamtamasyz etip, jalǵan eseptiliktiń aldyn alýǵa múmkindik beredi.
Sýbsıdııalaý júıesi tolyqtaı tsıfrlyq formatqa kóshirilgen jáne memlekettik qoldaýdyń 20 baǵytyn qamtıdy. Bıyl mobıldi qosymsha iske qosylyp, aýyl sharýashylyǵy taýaryn óndirýshilerge keńes beretin jasandy ıntellekt negizindegi chat-bot engiziledi dep josparlanǵan.
Negizgi mindetterdiń biri — «e-AÓK» biryńǵaı tsıfrlyq ekojúıesin qalyptastyrý. Onyń sheńberinde salalyq derekter qoımasy qurylyp, jasandy ıntellekt negizinde taldaý júıeleri damytylady.
Mınıstr baıandamalardy tyńdap bolǵannan keıin jobalardy iske asyrýdy jedeldetýdi jáne oryndaýshylardyń jeke jaýapkershiligin arttyrýdy talap etti.
— Barlyq mal basy tolyq sáıkestendirilýi tıis. Al ósimdik sharýashylyǵyndaǵy júıe fermerge qolaısyzdyq týdyrmaıtyndaı, yńǵaıly bolýy kerek. Onyń mindeti — kúrdeli júıelerdiń áýre sarsańyna túsý emes, sapaly, mol ónim alý, — dedi Aıdarbek Saparov.
Odan ári salalyq júıelerge jasandy ıntellekt elementterin qysqa merzimde engizýdi kúsheıtý tapsyryldy. Bul qyzmetterdiń ashyqtyǵy men tıimdiligin arttyrýǵa múmkindik beredi.
Eske salaıyq, Eýropalyq kompanııalar Qazaqstanda aýyl sharýashylyǵy tehnıkalaryn lokalızatsııalaýdy kózdep otyr.
