Agroónerkásiptik keshendi damytý baǵdarlamasyn iske asyrýǵa 5 jylda 1 trln. teńge qarjy qajet - A. Kúrishbaev
ASTANA. Qazannyń 5-i. QazAqparat /Rýslan Ǵabbasov/ - Agroónerkásiptik keshendi damytý baǵdarlamasyn iske asyrýǵa 5 jylda 1 trln. teńge qajet bolady. Bul týraly búgin Úkimet otyrysynda Agroónerkásip keshenin damytýdyń 2010-2014 jyldarǵa arnalǵan baǵdarlamasynyń jobasy boıynsha baıandama jasaǵan Aýyl sharýashylyǵy mınıstri Aqylbek Kúrishbaev málim etti.
«Baǵdarlamany iske asyrý kezinde jalpy 5 jylǵa 1 trln. teńge qajet bolady. Sýbsıdııalardyń úlesi 20 paıyzdan 25 paıyzǵa deıin artady», dep atap ótti vedomstvo basshysy.
Onyń sózine qaraǵanda, atalǵan baǵdarlama aıasynda eginshilik salasyn ártaraptandyrý sharalary júrgizilip, onyń esebinen egistik alqaptarynyń qurylymy ǵylymı negizdelgen deńgeıge deıin jetkiziletin bolady. 5 jyldyń ishinde astyqtyń jalpy óndirisiniń ortasha jyldyq kólemi 17,8 mln. tonnaǵa, eksporttyq áleýet 6,7 mln. tonnadan 8,6 mln.tonnaǵa nemese 28 paıyzǵa ulǵaıady.
Sondaı-aq astyq eksportynyń jalpy kólemindegi óńdelgen óniminiń úlesi 32 paıyzdan 50 paıyzǵa deıin artady. Munymen qosa ishki tutynýdaǵy otandyq qant qyzylshasynan óndirilgen qanttyń úlesi 5 paıyzdan 17 paıyzǵa deıin ósedi dep kútilýde. «Asyl tuqymdy maldardyń ortasha úlesi 6-dan 14 paıyzǵa deıin ulǵaıady. Al qus sharýashylyǵyn damytý jumystary ımporttyq táýeldilikti tómendetýge múmkindik beredi», dep atap ótti A. Kúrishbaev.
Mınıstrdiń aıtýynsha, elimizdegi ishki tutynystaǵy qus eti ımportynyń úlesi 58 paıyzdan 25 paıyzǵa tómendeıdi.
