Agroónerkásiptik keshendegi erikti saqtandyrý júıesi iske qosyldy

NUR-SULTAN. QazAqparat - Elimizde agroónerkásiptik keshendegi erikti saqtandyrý júıesi iske qosyldy. Bul týraly QR Aýyl sharýashylyǵy mınıstri Saparhan Omarov esep berý kezdesýinde aıtty, dep habarlaıdy QazAqparat tilshisi.

«2020 jyldan bastap ósimdik sharýashylyǵyndaǵy mindetti zańnamalyq saqtandyrýdyń kúshi joıylyp, ornyna agroónerkásiptik keshendegi erikti saqtandyrý júıesi iske qosyldy. Osy jyldyń maýsymynan bastap mınıstrlik erikti saqtandyrý boıynsha barlyq zańǵa táýeldi aktilerdi qabyldady. Operator retinde Aýyl sharýashylyǵyn qarjylaı qoldaý qory saqtandyrý ónimderin iske qosty. Olar boıynsha saqtandyrý syıaqysynyń bir bóligin 50 paıyz sýbsıdııalaý kózdelgen», - dedi mınıstr Ortalyq komýnıkatsııalar qyzmetindegi onlaın kezdesýde.

Saparhan Omarovtyń atap ótýinshe, aýyl sharýashylyǵyn qarjylandyrýǵa ekinshi deńgeıdegi bankterdi tartý úshin, onyń ishinde «Qarapaıym zattar ekonomıkasy» baǵdarlamasyna sáıkes agroónerkásiptik keshenniń basym salalary boıynsha qaryzdardy kepildendirýdiń jańa quraly ázirlendi.

«Agroónerkásiptik keshenniń jańa kún tártibi aıasynda atalǵan barlyq tásildemelerdi iske asyrý agroónerkásiptik keshenniń áleýetin ashýǵa múmkindik berip, salanyń serpindi jáne údemeli damýyn qamtamasyz etedi», -dedi ol.