Agroónerkásipti damytý tek agrobıznespen shektelmeýi kerek - Q. Aıtahanov
ASTANA. 19 jeltoqsan. QazAqparat - «Agrobıznes-2020» baǵdarlamasy der kezinde qabyldanyp otyr. Alaıda aýyldy damytý úshin bul baǵdarlama jetkiliksiz. Búgin Parlament Senatynyń jalpy otyrysynda senator Qýanysh Aıtahanov osylaı málim etti. Eske sala keteıik, jıyn barysynda «Qazaqstan Respýblıkasynyń keıbir zańnamalyq aktilerine agroónerkásiptik keshen máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqylanǵan bolatyn.
«Agrobıznes úshin óndiris quraldary, aýyl sharýashylyq tehnıkalaryn shyǵarý, aýyldyń turmysyn qala turǵyndarynyń turmysyna jaqyndatý, óndirilgen azyqtyq ónimderdi daıyndap, ony tereń óńdep tutynýshyǵa jetkizý sekildi keshendi is sharalar qamtylýy tıis. Bul úshin aýyldy keshendi túrde damytýymyz kerek: jol, mektep, densaýlyq saqtaý, mádenıet, sport, baılanys nysandarynyń bolýy, eldi-mekenderdi gazdandyrý sekildi máselelerdiń barshasy sheshilse ǵana, agroónerkásip kesheni damıdy, aýyl gúldenedi. Eń bastysy aýylda maman turaqtanady», - dep túıindeıdi Q. Aıtahanov.
Senator bul baǵytta birshama sharalar atqarylǵanymen, onyń áli de jetkiliksizdigin alǵa tartady. Soǵan oraı, depýtat «Gúldense aýylymyz - gúldenemiz bárimiz!» degen uran barsha halyqtyq uranǵa aınalýy tıistigin, osy arqyly barsha jurt jumylyp aýyldy gúldendirýleri kerektigin alǵa tartady.
«Búginde aýylǵa qarjy kerek. Sharýalarǵa arzan, qoljetimdi nesıe berýdiń tetikteri áli de bolsa tolyq sheshilmegen. Respýblıka halqynyń 46 paıyzy aýylda turady. Al ekinshi deńgeıli bankterdiń nesıe portfeliniń nebári 3,5 paıyzy ǵana aýyl sharýashylyǵyna jumsalǵan. Osy rette aýyl sharýashylyǵy bankin ashý máselesiniń aıtylǵanyna on jyldaı ýaqyt bop qaldy. Bári osyny durys dep qoldaıdy, alaıda bul sheshimin tappaıdy», - dedi ol.
Sonymen qatar, senator aýyldaǵy kadr máselesine de toqtalyp ótti. Onyń sózine qaraǵanda, agroónerkásip salasynda kadr daıarlaý máselesi syn kótermeıdi. Oqý oryndarynyń aýyl sharýashylyǵy salasymen baılanystary da úzilgen. Olardyń oqý-tájirıbe sharýashylyqtary, klınıkalary men zerthanalary da joq, bilim sapasy da tómen. «Ásirese, veterınarııa salasynyń ahýaly aýyr. Materıaldyq bazasy tómen. Respýblıka boıynsha 191 aýdandyq veterınarııa stansalarynyń 31 paıyzy ǵana, 2 359 vetpýnktiń 10 paıyzynyń ǵana jeke ǵımarattary bar. Veterınarlardyń eńbekaqylary da tómen, olardyń ortasha jalaqysy men alatyn aılyǵy 60-100 myń arasynda ǵana. Endeshe olardyń jalaqysyn 2,3-3 esege deıin arttyrǵan oryndy», - deıdi Q. Aıtahanov.
