Agroónerkásip kesheniniń nesıe seriktestigi qaýymdastyǵy quryldy

ASTANA. 4 aqpan. QazAqparat - Qazaqstanda Agroónerkásip kesheniniń nesıe seriktestigi qaýymdastyǵy qoǵamdyq uıymy quryldy. Uıym aýylda qyzmet etetin nesıe uıymdarynyń birlestigi bolyp tabylady.

Bul týraly «Agrarlyq nesıe korporatsııasy» AQ baspasóz qyzmetinen habarlandy.

Qaýymdastyq týraly sheshim «QazAgro» holdınginiń enshiles kompanııasy bolyp tabylatyn «Agrarlyq nesıe korporatsııasy» AQ uıymdastyrýymen ótken nesıe seriktestikteriniń jalpy jınalysynda qabyldandy. Jıynǵa korporatsııanyń áriptesteri bolyp tabylatyn 12 nesıe seriktestikteri qatysqan bolatyn.

Atap óterligi, búgingi tańda aýyldyq jerlerde qyzmet etip jatqan nesıe seriktestikteri korporatsııanyń belsendi qoldaýy arqasynda qurylǵan bolatyn. Osynyń arqasynda 2001-2013 jyldar aralyǵynda elimizdiń 13 oblysynyń 160 aýdanynda 163 nesıe seriktestikteri jumys isteı bastady. Bular Qazaqstan aýmaǵynyń shamamen 90,4% quraıdy ( respýblıkada 177 ákimshilik aýdandar bolsa, onyń 22-si qala mańyndaǵy aımaqtar).

1 qańtar 2013 jylǵy jaǵdaı boıynsha nesıe seriktestikterinde 8 114 aýyl sharýashylyǵy qurylymdary bolsa, olardyń 82 paıyzy - sharýa qojalyqtary, 10% - JShS jáne 8% basqa uıymdar bolyp otyr. 2001-2012 jyldar aralyǵynda bıýdjetten nesıe seriktestikterine 46 mlrd. 926,9 mln.teńge bólinip, bular tolyǵymen ıgerildi. Sondaı-aq osy merzim aralyǵynda 161 nesıe seriktestigine 98 mlrd. 627,7 mln. teńge bólingen.

Sonymen qatar, byltyr Agrarlyq nesıe korporatsııasymen Atyraý, Aqmola, Qaraǵandy, Batys Qazaqstan oblystarynda 8 jańa nesıe seriktestikteri qurylǵan.