Agroónerkásip keshenindegi jobalardy qarjylandyrý qalaı júrgizilip jatyr
NUR-SULTAN. Qazaqparat – Búgin Úkimet otyrysynda «Báıterek» UBH» AQ basqarma tóraǵasy Aıdar Áriphanov agroónerkásip keshenindegi jobalardy qarjylandyrý baǵyty týraly baıandady, dep habarlaıdy QazAqparat tilshisi.
«Báıterek» holdıngi bıylǵy 10 aıynda AÓK salasyn 393 mlrd teńgege qarjylandyrýdy qamtamasyz etti. Onyń ishinde kóktemgi egis jumystaryn júrgizýge 70 mlrd teńge baǵyttaldy, aýyl sharýashylyǵy tehnıkasyn lızıngke satyp alý 132 mlrd teńgege qarjylandyryldy. Sonymen qatar, aýyldy jerlerde 60 mlrd teńge somasyna mıkrokredıt berildi, qarjy ınstıtýttaryn (KS jáne MQU) qorlandyrý júıesi arqyly AÓK salasy 65 mlrd teńge somasyna qarjylandyryldy. Tikeleı kredıt berý shamamen 31 mlrd teńgeni qurady. Munymen qosa, AÓK-tegi ınvestıtsııalyq jobalardy qarjylandyrýǵa 35 mlrd teńge baǵyttaldy», - dedi Aıdar Áriphanov.
Onyń aıtýynsha, Agrarlyq nesıe korporatsııasy (ANK), Qazaqstannyń Damý Banki (QDB) jáne Qazyna Kapıtal Menedjment (QKM) AÓK-tegi ınvestıtsııalyq jobalardy qarjylandyrady. Aǵymdaǵy jyldyń sońyna deıin 33 mlrd teńge somasyna taǵy 19 ınvestıtsııalyq jobany qarjylandyrý josparlanyp otyr.
«Aýyl sharýashylyǵy mınıstrligi bıyl iske asyrýdy josparlaǵan 285 ınvestıtsııalyq jobanyń ishinen 69 jobanyń bastamashylary Holdıngtiń enshiles kompanııalaryna júgindi, suratylǵan qarjylandyrý somasy 63 mlrd teńgeni qurady. Atalǵan jobalardyń ishinen Holdıngtiń enshiles kompanııalary 67 jobany qarjylandyrdy jáne 2 joba maquldaý satysynda», - dedi basqarma tóraǵasy.
Budan buryn habarlanǵandaı, bıyl agroónerkásip keshenindegi jol kartalary aıasynda 263 mlrd teńge somasyna 285 jobany iske asyrý josparlanǵan.
