«Agroónerkásip keshenindegi kredıttik seriktestikter qaýymdastyǵy» birlestigine jańa basshy saılandy
ASTANA. QazAqparat - Astanada «Agroónerkásip keshenindegi kredıttik seriktestikter qaýymdastyǵy» zańdy tulǵalar birlestigi músheleriniń ortaq jıyny ótti. Elimizdiń 10 aımaǵynan kelgen kredıttik seriktestik ókilderiniń basqosýynda Qaýymdastyqtyń jańa basshysy bolyp Saǵatova Almıra Saıyndoldaqyzy saılandy. Bul týraly birlestiktiń baspasóz qyzmetinen habarlandy.
«Qaýymdastyqtyń buǵan deıingi tóraǵasy Tóleýtaı Rahymbekov óz ótinishi boıynsha qyzmetinen bosatyldy. A.Saǵatova osyǵan deıin «Agrarlyq nesıe korporatsııasy» AQ Kredıttik seriktestiktermen jumys jónindegi departament dırektory qyzmetin atqarǵan. Bilimi joǵary, Shyǵys Qazaqstan Memlekettik ýnıversıtetiniń «Ekonomıka jáne menedjment» mamandyǵyn támámdaǵan. Ár jyldary «ATF Bank» AQ Óskemen qalasyndaǵy fılıal dırektorynyń orynbasary, «Kazkommertsbank» AAQ Rıdder qalasyndaǵy aýdandyq kredıt bóliminiń basshysy qyzmetterin atqarǵan», - delingen baspasóz baıanynda. Sondaı-aq, otyrys barysynda Qaýymdastyq músheleri Qaýymdastyqtyń 2015 jylǵy 9 aı ishinde atqarǵan jumys nátıjelerin qarady.
