Agroónerkásip keshenindegi ınvestıtsııalyq jobalar kepildendiriledi

NUR-SULTAN. QazAqparat - Memleket basshysy Qasym-Jomart Toqaev bıylǵy Qazaqstan halqyna arnaǵan joldaýynda «Qazaqstannyń aldynda turǵan asa mańyzdy mindet – ónerkásiptik áleýetimizdi tolyq paıdalaný. Osy saladaǵy tabystarymyzǵa qaramastan, ishki naryqtyń zor múmkindikterin áli de bolsa tolyqqandy júzege asyra almaı kelemiz. Óńdelgen taýarlardyń úshten ekisine jýyǵy shetelden ákelinedi», - degen bolatyn.

ıAǵnı, óz óndirisimizdi damytyp, syrttan taýar tasýdy azaıtýdyń mańyzy óte zor. Osy Joldaýda Prezıdent aýyl sharýashylyǵyn damytpaı, básekege qabiletti ekonomıka qurý múmkin emes ekenin de eskertip, elimizde et, jemis-jıdek, kókónis, qant, bıdaı, maıly daqyldar, sút ónim­derin óndirý jáne óńdeý úshin 7 iri eko­júıe qalyptastyrýǵa bolatynyn aıtty. Osyndaı jobalardy júıeli túrde iske asyrý úshin kásipkerlerge qomaqty somada nesıe berý jáne bank beretin nesıeniń jartysyn kepildendirýdiń róli úlken. Memleket basshysynyń joldaýda júktegen tapsyrmasyn júzege asyrý qolǵa alyndy.

Atap óter jaıt, aýyl sharýashylyǵy salasy aıryqsha kóńil bólýdi qajet etedi. Ásirese, basymdyqqa ıe ınvestıtsııalyq jobalarǵa qoldaý kórsetetin kez jetti. Mysaly, kóbinese kóldeneń bolatyn kepildik máselesi. Ekinshi deńgeıli bankterden aýyl sharýashylyǵyna nesıe alý kórsetkishi keıingi jyldary kúrt tómendep ketken. Bul jerdegi negizgi másele taǵy osy kepildik. Bankter qalalyq jerdegi jyljymaıtyn múlikterdi ǵana kepildeme retinde qabyldaıdy. Olar aýylǵa nesıe berýdiń táýekeli joǵary degen ýáj aıtady. Osy máseleni sheshý úshin QR Aýyl sharýashylyǵy mınıstrligi ekinshi deńgeıli bankter beretin nesıeni kepildendirý mehanızmin qoldanysqa engizdi. Jańa mehanızmniń artyqshylyǵy kóp. Ony kásipkerlerdiń bilgeni mańyzdy.

Aıtalyq, «QazAgro» holdınginiń enshiles kompanııasy Aýyl sharýashylyǵyn qarjylaı qoldaý qory «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy arqyly mıkroqarjy uıymdary men nesıe seriktestikteriniń jáne ekinshi deńgeıli bankterdiń AÓK salasyndaǵy ınvestıtsııalyq jobalardy iske asyrýǵa beretin nesıelerin kepildendiretin operator qyzmetin atqarady. Batys Qazaqstan oblysynda agrarlyq saladaǵy ınvestıtsııalyq jobany iske asyrýǵa bank arqyly rásimdelgen nesıeniń alǵashqy kepildigi berildi.

Kaztalov aýdanyndaǵy kásipker Sergeı Gorovoı osydan bir jyl buryn nesıe alyp, 5 myń basqa arnalǵan bordaqylaý alańyn ashqan. Bordaqylaý alańynyń jumysyn odan ári damytý úshin taǵy qosymsha qarjy qajet bolypty. Nesıe alýǵa kepil múlki jetpegen soń kásipker Aýyl sharýashylyǵyn qarjylaı qoldaý qoryna júgingen.

«Biz Agrarlyq nesıe korporatsııasynan 850 mln teńge nesıe alǵanbyz. Biraq bul qarjy jobany oıdaǵydaı iske asyrýǵa jetpedi. Bıyl bank 1,3 mlrd teńgeniń nesıesin maquldady. Nesıeniń jartysyn Aýyl sharýashylyǵyn qarjylaı qoldaý qory kepildendirdi», - deıdi kásiporyn basshysy Sergeı Gorovoı.

Bul qarjy úlken jobany júzege asyrýǵa jetkilikti. Endi fermer bordaqylaý alańyn alańsyz órkendetip, et naryǵyna úles qosady.

Aıta ketý kerek, bank nesıesiniń negizgi sharty boıynsha osyndaı ınvestıtsııalyq jobalardy qarjylandyratyn bolsa, Aýyl sharýashylyǵyn qarjylaı qoldaý qory kepildendirýi tıis. Bank 17%-ben 10 jylǵa beretin nesıe 3 mlrd teńgeden aspaýy kerek. Kepildeme agroónerkásip keshenindegi ınvestıtsııalyq jobalardy iske asyratyn jáne tamaq óndirisimen aınalysatyn barlyq bıznes ókilderine beriledi.

Aýyl sharýashylyǵyn qarjylaı qoldaý qory nesıe somasynyń 50 %-na deıin kepildendiredi. Basym ınvestıtsııalyq jobalar iske qosylǵansha kepildik mólsheri 85 %-ǵa deıin bolady. Joba tolyq iske qosylǵannan keıin kepildik mólsheri 50%-ǵa deıin tómendeıdi.

Negizgi basym ınvestıtsııalyq jobalarǵa taýarly sút fermalary, etti qus sharýashylyǵy, qarqyndy baqtar, jylyjaılar, qant qyzylshasyn ósirý jáne qyzylsha qantyn óndirý, jarma óndirisi, kókónister men jemisterdi qaıta óńdeý, ósimdik maıy men maı ónimderin óndirý jobalary kiredi.

Bul aıtyp otyrǵanymyz agroónerkásip kesheniniń ınvestıtsııalyq jobalaryn memlekettik qoldaý baǵytynda atqarylyp jatqan jumys. Importqa táýeldilikti joıý úshin óz óndirisimizge basymdyq berýdiń artyqshylyǵy kóp. Igiligin halyq kóredi. Kásipkerler de memlekettiń qoldaýyn sezinip, ónim kólemin arttyrady. Qazaqstan agrarly memleket. Sondyqtan, ıgi bastama aıaqsyz qalmaı, aýqymdy jobalarǵa jol ashylady degen úmit zor.