Agroónerkásip keshenin damytýdyń jańa baǵdarlamasy: memleket bıdaıdy satyp alýdy azaıtady
Vıtse-mınıstr Qaırat Aıtýǵanovtyń aıtýynsha, aldaǵy jyldary astyq alqaptarynyń kólemin 2,3 mln. gektarǵa azaıtý josparlanǵan. Osynyń nátıjesinde jyl saıyn 3 mln. tonnaǵa az bıdaı jınalatyn bolady. "Búginde bizde 2,9 mln. tonna bıdaı artyǵymen qalyp otyrady. Endi, sonyń ornyna maıly daqyldardy kóptep ósirý kózdelip otyr. Sebebi elimizde osy sanattaǵy ónimderdiń tapshylyǵy qatty baıqalady. Osy kásipke aýysatyn sharýalar atalǵan ónimdi qaıda satamyz dep alańdamasa bolady. Sebebi biz ony da bıdaı sııaqty memlekettik qorǵa satyp alamyz", - deıdi Q.Aıtýǵanov.
Onyń sózine qaraǵanda, qazirgi kezde kombıkorm (1,3 mln. tonna), arpa (1,2 mln. tonna), qant qyzylshasy (1 mln. tonnaǵa jýyq), júgeri jáne taǵy basqa dándi-daqyldarǵa suranys joǵary bolyp tur. Sonyń barlyǵy syrttan jetkiziledi. Al jańa baǵdarlama aıasynda atalǵan ónimderdi ózimizde óndirip, ishki naryqty barynsha toltyrý josparlanǵan.
Budan bólek, et pen sút óndirisin damytý jumysyna basa nazar aýdarylady. "Qazirgi kezde bizde et pen sút zaýyttary bar. Biraq ol zaýyttardyń óńdeýine túsetin shıkizattyń kólemi az bolyp tur. Máselen, sharýalar sútti ózdigimen satyp jatady. Al sút zaýyty tek 50 paıyzǵa ǵana jumys isteıdi. Endigi kezekte, atalǵan kórsetkishti barynsha kóterip, ónim óńdeý kólemin arttyrýdy josparlanyp otyr. Biz aldymen ishki naryqty daıyn otandyq ónimmen toltyryp alýymyz qajet. Sodan baryp ekportqa shyǵýǵa bolady. Áıtpese, qazir bizdiń syrtqa shyǵaratyn taýarymyzdan góri syrttan satyp alatyn taýarymyz basym bolyp otyr. Biz mınýsqa ketip jatyrmyz", - dep atap kórsetti vıtse-mınıstr.
Osylaısha, memleket mal sharýashylyǵy salasynyń tıimdiligin 58 paıyzǵa, al ósimdik sharýashylyǵyn 40 paıyzǵa deıin arttyrmaqshy.