Agroónerkásip keshenin damytý baǵdarlamasyn qaıta qaraý kerek - Senat tóraǵasy
NUR-SULTAN. QazAqparat – Úkimettiń is-qımyl josparynyń negizgi erejelerin Parlamenttiń, óńirlerdiń, ekonomıka salalary men qoǵam ókilderiniń qatysýymen talqylaý qajet. Bul týraly Parlament Senatynyń tóraǵasy Darıǵa Nazarbaeva málim etti, dep habarlaıdy QazAqparat tilshisi.
«Negizgi basymdyqtardy Qasym-Jomart Kemeluly Toqaev óz Málimdemesinde anyq aıqyndap berdi. Úkimetke jáne Ulttyq bankke neǵurlym kóp zardap shekken salalardy qoldaýdy qamtıtyn Ekonomıkalyq ósimdi qalpyna keltirý boıynsha keshendi jospardy 11 mamyrǵa deıin daıyndaý tapsyryldy. Búgingi jaǵdaıda, ekonomıkanyń barlyq salalary men halyq memlekettiń qoldaýyna muqtaj. Álemdik ekonomıkadaǵy keleńsiz ahýal men resýrstardyń shekteýli bolýyn eskeretin bolsaq, ártúrli stsenarııler men boljamdardy qarastyryp, naqty múmkindikter men rezervterge baǵa berýimiz qajet», - dedi D. Nazarbaeva Senattyń jalpy otyrysynda.
Onyń paıymynsha, Úkimettiń is-qımyl josparynyń negizi erejelerin Parlamenttiń, óńirlerdiń, ekonomıka salalary men qoǵam ókilderiniń qatysýymen talqylaý qajet. Bul talqylaýsyz qabyldanǵan qujat bolmaýy kerek. Bul máseleler búkil qoǵamdy tolǵandyrady.
«Agroónerkásip keshenin damytý strategııasyna erekshe kóńil bólý qajet. Atap aıtqanda, jer jyrtyp, mal ósirip otyrǵan iri, orta jáne shaǵyn bıznes azyq-túlik qaýipsizdigin qamtamasyz etip keledi. Jyl basynda ótken parlamenttik tyńdaýda agroónerkásip sektoryna jasalǵan taldaý osy salada problemanyń kóp ekenin kórsetti. Burynǵy problemalarǵa endi tótenshe jaǵdaı kezindegiler qosyldy. Bul Agroónerkásip keshenin damytýdyń memlekettik baǵdarlamasyn qaıta qaraý kerek ekenine taǵy da kózimizdi jetkizip otyr. Osy aýyl sharýashylyǵy men hımııa, jeńil ónerkásipten bastap saýdaǵa deıingi oǵan qatysty ındýstrııalar, el ekonomıkasyn qalpyna keltirip, ósýge negiz bolýǵa qabiletti», - dedi Senat tóraǵasy.
«Búkil álem kóptegen elderde ashtyqtyń oryn alý yqtımaldyǵy joǵary ekenin talqylap jatqanda, biz jınalǵan ónimdermen ne isterimizdi bilmeı otyrmyz. Bul jaǵdaıdy máslıhattar men tekserý komıssııalary qatań baqylaýǵa alý qajet dep esepteımin. Máslıhat depýtattaryna ótinish – barlyq memlekettik jáne jeke saqtaý oryndary men qoımalarynyń tolymdylyǵyna ınventarızatsııa júrgizý qajet. Áleýmettik kásipkerlik korporatsııa arqyly bos alańdardy jalǵa alyp, erte pisetin kókónisterdi sol jerge jınap, keıin saýda núktelerine taratýǵa bolady», - dep atap ótti D. Nazarbaeva.
Senat tóraǵasynyń aıtýynsha, oblystar boıynsha astyq ónimderi men ony satyp alý baǵasynyń boljamdaryn taǵy bir ret baǵalaý qajet. Bul máselemen dál qazir aınalysý kerek, óıtkeni, astyq jınaıtyn kezde buǵan ýaqyt bolmaıdy.
«Fermerlerdiń eńbegin zaıa ketirýge bizdiń quqyǵymyz joq. Olarǵa memlekettiń kómegi qajet, ony osy aıdyń tájirıbesi kórsetti. Kómekti ishki naryq qajettiligine, sondaı-aq qaıta óńdeý men eksport múmkindikterine qaraı kórsetý kerek», - dedi Darıǵa Nazarbaeva.
