Agroónerkásip kesheni azyq-túlik qaýipsizdigin qamtamasyz etý mindetin tolyq oryndap otyrǵan joq - Prezıdent

ASTANA. QazAqparat – Agroónerkásip kesheni azyq-túlik qaýipsizdigin qamtamasyz etý mindetin tolyq oryndap otyrǵan joq. Bul týraly Parlament palatalarynyń birlesken otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Azyq-túlik qaýipsizdigin qamtamasyz etýge basa mán berý qajet. Ashyǵyn aıtsaq, agroónerkásip kesheni bul mindetti tolyq oryndap otyrǵan joq. Osy saladaǵy saıasat birizdi emes. Memleket tarapynan bólinip jatqan qarajat tıimdi jumsalmaıdy. Ónim óndirýshi men tutynýshynyń arasynda deldal kóp», - dedi Memleket basshysy.

Prezıdent kepildik qamtamasyz etýge talaptyń joǵary ekendigin atap ótti. Agrobıznesti qorlandyrýdyń balama quraldary baıaý damyp kele jatqandyǵyna nazar aýdardy.

«Bul azyq-túlik ınflıatsııasy dınamıkasyna teris áser etedi. Aýyl sharýashylyǵyn qarqyndy damytýǵa qajetti jaǵdaı jasaý – memlekettiń mindeti», - dedi Prezıdent.