Agrokeshendi damytýdyń jańa tujyrymdamasy tanystyryldy
QR Aýyl sharýashylyǵy mınıstrligi «Atameken» UKP-nyń AÓK jáne tamaq ónerkásibi komıtetteriniń birlesken otyrysyna Qazaqstannyń barlyq óńirlerinen 350-den astam aýyl sharýashylyǵy taýaryn óndirýshiler, ǵylymı uıymdardyń, fermerlerdiń salalyq qaýymdastyqtary men odaqtarynyń ókilderi, sondaı-aq BUU Azyq-túlik jáne aýyl sharýashylyǵy uıymynyń (FAO) sarapshylary qatysty.
Belgili bolǵandaı, mańyzdy qujatty ázirleýge FAO sarapshylary men AShM, «Atameken» UKP, bıznes jáne ǵylym ókilderinen quralǵan arnaıy jumys toptary tartylǵanyn habarlady.
Birlesken otyrys barysynda Ulttyq jobanyń tujyrymdamasyn QR Aýyl sharýashylyǵy vıtse-mınıstri Rústem Qurmanov tanystyrdy. Ol qujat AÓK-ti damytýdyń 15 basym baǵytynan turatynyn, olardyń árqaısysy boıynsha naqty sharalar men ındıkatıvter kózdelgenin habarlady.
«Joba AÓK salasy qyzmetkerleriniń tabysyn eki esege arttyrýǵa, 1 mln-nan astam aýyl turǵynyn turaqty tabyspen qamtamasyz etýge, óndiristik ekojúıege 350 myń fermerlik jáne úı sharýashylyqtaryn tartýǵa, sondaı-aq 70 myń otbasylyq agrarlyq sharýashylyqty qurýǵa baǵyttalǵan», - dedi vıtse-mınıstr.
Rústem Qurmanov qujattyń negizgi jańalyqtaryna toqataldy. Bul turǵyda fermerlerge nesıe berý joldaryn men qarjylandyrý quraldaryn keńeıtý, tsıfrlandyrý arqyly resýrstarǵa ashyq jáne ádil qol jetkizýdi qamtamasyz etý, memlekettik qoldaý sharalarynyń turaqtylyǵy men sabaqtastyǵyn bekitý, óńirlerdiń mamandanýyn eskere otyryp sýbsıdııalar bólý, eksporttaýshylardy qoldaýdyń ońtaıly júıesin engizý, agroónerkásiptik keshen sýbektileriniń bilimin taratý júıesin jetildirý eskerilgen.
Ulttyq jobanyń tujyrymdamasyn talqylaý barysynda kásipkerler men fermerler birqatar eskertýler men usynystar aıtty. Olardyń barlyǵy Ulttyq kásipkerler palatasy alańynda jobany qaıta talqylaý aldynda eskeriletin bolady.