«Agrofırma», «Rodına», «Zenchenko ı K» kompanııalary básekelestik talaptaryn buzǵany anyqtaldy

ASTANA. QazAqparat - Astana qalasy monopolııaǵa qarsy departamenti naryq sýbektileriniń sút ónimderin satý kezinde kelisilgen áreketteriniń faktileri anyqtaldy, dep habarlaıdy QazAqparat departamenttiń Facebook paraqshasyna silteme jasap.

Paraqshadaǵy málimetterge qaraǵanda, «Qazaqstan Respýblıkasy Básekelestikti qorǵaý jáne damytý agenttiginiń Astana qalasy boıynsha departamenti» RMM, «Astana qalasynyń Investıtsııalar jáne kásipkerlikti damytý basqarmasy» memlekettik mekemesiniń haty negizinde, Astana qalasynyń shekarasynda sút ónimderin: sút, aıran, súzbe, tuzsyz sary maıdy kóterme saýdada ótkizýge taldaý jasaldy.

Zerttelgen málimetterge sáıkes, naryq sýbektileri «Agrofırma», «Rodına» jáne KT «Zenchenko ı K» JShS-niń 2020 jyldyń naýryz aıynda jáne 2022 jyldyń sáýir aıynda sút ónimderin ótkizý baǵasynyń bir mezgilde kótergendigi anyqtaldy.

Osylaısha, Departament «Agrofırma», «Rodına» jáne «Zenchenko ı K» JShS-ne (sút, aıran jáne súzbe) qatysty Kásipkerlik kodeksiniń 170 babynda kózdelgen baǵalardy belgileý jáne (nemese) ustap turý bóliginde básekelestikke qarsy kelisilgen áreketterdiń belgilerin kórdi.

Atalǵan naryq sýbektilerinde barlyq sút ónimderin qosa alǵanda, áleýmettik mańyzy bar azyq-túlik taýarlarynyń baǵasy da birdeı ekendigi anyqtaldy.

Atalǵan materıaldar (sýbektilerdiń tirkelýine qaraı) Soltústik Qazaqstan jáne Aqmola oblystary boıynsha aýmaqtyq departamentterine sút, aıran jáne súzbe boıynsha habarlamalar shyǵarý úshin joldandy.

Aýmaqtyq departamentter sýbektilerge oryndalýy 30 kún merzimmen (2023 jylǵy 14-15 qańtar) habarlamalar shyǵardy.

«Eger naryq sýbektisi habarlamada kórsetilgen áreketterdi (áreketsizdikti) osy baptyń 2-1-tarmaǵynda belgilengen merzimderde toqtatpasa, monopolııaǵa qarsy organ tergep-tekserý júrgizý týraly sheshim shyǵarady.

Sonymen qatar, taldaý sheńberinde 10-nan astam kóterme naryq sýbektilerinde ÁMAT úshin 15% eń joǵary ústeme baǵadan asyrǵany anyqtaldy.

Shara qabyldaý úshin materıaldar Astana qalasynyń ákimdigine joldandy»,-delingen habarlamada.