AGROFEST – 2025: Batys Qazaqstandaǵy basty agrarlyq festıval bastaldy
ORAL. KAZINFORM - Batys Qazaqstan oblysynyń Sulýkól aýylynda agrarlyq kúntizbedegi eń aıtýly is-sharalardyń biri – AGROFEST – 2025 óz jumysyn bastady.
Festıval tórtinshi ret Qazaqstannyń barlyq óńirinen jáne Reseıdiń kórshiles aımaqtarynan kelgen agroónerkásip kesheniniń jetekshi ókilderin biriktirip otyr.
Aýyl sharýashylyǵy mınıstrligi málimetinshe, eki kún ishinde is-sharaǵa 8 myńnan astam qatysýshy – sharýalar, ınvestorlar, ǵylym, bıznes jáne memlekettik organdardyń ókilderi qatysady dep josparlanyp otyr.
– AGROFEST –aýyl sharýashylyǵyna adal, el ıgiligi úshin kún saıyn eńbek etip júrgenderdi biriktiretin biregeı alań. Búgin biz Memleket basshysy aıqyndaǵan mindetke saı – egin ónimdiligin eki eseleý jáne aýyl sharýashylyǵyn ekonomıkanyń negizgi draıverine aınaldyrý jolynda jumys isteýimiz qajet. Ol úshin barlyq baǵytta alǵa jyljýymyz kerek – tsıfrlandyrýdan bastap tehnıka jańǵyrtýǵa, mal sharýashylyǵyn damytýǵa, naryqtardy keńeıtý men ınvestıtsııa tartýǵa deıin, – dedi festıvaldiń ashylýynda QR Aýyl sharýashylyǵy vıtse-mınıstri Baǵlan Bekbaýov.
Vıtse-mınıstr atap ótkendeı, bıyl erekshe kóńil qazaqstandyq «aqbas» iri qara tuqymynyń 75 jyldyǵyna bólindi. Bul tuqym alǵash ret dál osy Batys Qazaqstan oblysynda shyǵarylyp, búginde otandyq mal sharýashylyǵynyń sımvolyna aınalǵan.
– 2025 jyl Qazaqstanda Jumysshy mamandyqtar jyly bolyp jarııalandy. Al AGROFEST – 2025 agrarlyq mamandyqtardy nasıhattaý jáne aýyl sharýashylyǵyna qajetti kásipterdiń bedelin arttyrý boıynsha mańyzdy alańǵa aınaldy, – dep atap ótti Baǵlan Bekbaýov.
Festıval aıasynda mazmundy iskerlik baǵdarlama usynyldy: agrarlyq saıasat, ornyqty damý, agroekonomıka jáne tehnologııalar taqyryptarynda paneldik pikirtalastar men sektsııalyq sessııalar; jetekshi agrobıznes ókilderimen, ǵalymdarmen jáne tehnıka óndirýshilerimen tájirıbe almasý; AÓK bolashaǵyna qatysty trendter, syn-tegeýrinder men sheshimderdi talqylaý.
Barlyq óńirden kelgen fermerlik sharýashylyqtar men kompanııalar óz ónimderin, zamanaýı tehnologııalaryn, jetistikteri men jańa ázirlemelerin kórme alańdarynda usyndy. Qatysýshylardyń erekshe qyzyǵýshylyǵyn aýyl sharýashylyǵy kásipteri boıynsha chempıonat týdyrdy. Onda tehnıka operatorlary, dánekerleýshiler jáne dástúrli mal sharýashylyǵynyń ókilderi óz sheberlikterin kórsetip jatyr.
Festıvaldiń basty oqıǵasy – «Aqbas» iri qara tuqymy boıynsha chempıonat. Munda Qazaqstannyń túkpir-túkpirinen ákelingen eń úzdik maldar kórsetiledi.
Sonymen qatar kókpar týrnıri, AgroSound mýzykalyq festıvali, etnostıl kúni aıasynda qolóner sheberhanalary, ulttyq oıyndar jáne ulttyq naqyshtaǵy sán kórsetilimi uıymdastyrylady.
Aıta keteıik, agroónerkásip kesheninde quny 3,3 trln teńge bolatyn 677 joba iske asyrylady.