«Agrobıznes-2020» baǵdarlamasyna 3 trln. teńge jumsaý kózdeledi
ASTANA. 10 qazan. QazAqparat - Qazaqstanda 2013-2020 jyldarǵa agroónerkásiptik keshendi damytý baǵdarlamasyna 3 trln. teńge shamasynda qarajat bólý josparlanyp otyr.
Bul týraly búgin Aýyl sharýashylyǵy mınıstrliginde ótken Agroónerkásip kesheniniń Іskerlik keńesinde jaýapty hatshy Evgenıı Aman málim etti.
«Agroónerkásip kesheni sýbektileriniń múmkindikterin zerdeleı kele, biz tórt negizgi baǵytty aıqyndadyq. Bular qarjylyq saýyqtyrý, olarǵa taýarlar men qyzmettiń qoljetimdiligin arttyrý, AÓK sýbektilerin qamtamasyz etýdiń memlekettik júıesin damytý, memlekettik basqarý júıesiniń tıimdiligin arttyrý», - deıdi E. Aman. Onyń aıtýynsha, atalǵan qarajattyń 75 paıyzy taýarlardyń, jumys pen qyzmettiń ekonomıkalyq qol jetimdiligine, 14 paıyzy agroónerkásip keshenin memlekettik qamtamasyz etýge, 10 paıyzy qarjylyq saýyqtyrýǵa baǵyttalady.
Sonymen qatar, agroónerkásip keshenderine qarastyrylatyn memlekettik sýbsıdııalar 2020 jylǵa qaraı 4,5 esege artyp, osy baǵytta qarjylyq saýyqtyrýǵa 300 mıllıard teńge jumsaý josparlanady.
Jalpy alǵanda «Agrobıznes-2020» baǵdarlamasy aýyl sharýashylyq taýarlaryn óndirýshilerdi qoldaýdyń 6 qarjylyq tetigin engizýdi qarastyrady. Bular: zaımdarǵa kepildik berý jáne saqtandyrý, ınvestıtsııalyq sýbsıdııalaý, nesıe men lızıngi boıynsha syıaqylyq mólsherlemeni sýbsıdııalaý, qarjylyq saýyqtyrý, ekinshi deńgeıdegi bankterdi qorlandyrý.
Budan bólek, fıtosanıtarlyq, veterınarlyq jáne azyq-túlik qaýipsizdigin qamtamasyz etýge baǵyttalǵan keshendi sharalar ázirlenedi. Baǵdarlamany iske asyrý aýyl sharýashylyǵy ónimderin 1,5 esege arttyrýǵa, aýyl sharýashylyǵy eńbekkerleriniń jumys tıimdiligin 3 esege arttyrýǵa septigin tıgizbek.
