«Agrobıznes-2020» baǵdarlamasyn jalpy qarjylandyrý somasy ózgergen joq - A. Mamytbekov

ASTANA. QazAqparat - Búgin Úkimet otyrysynda «Agrobıznes-2020» baǵdarlamasyna birqatar ózgerister men tolyqtyrýlar engizildi. Bul týraly búgin Ortalyq kommýnıkatsııalar qyzmetindegi brıfıngte QR Aýyl sharýashylyǵy mınıstri Asyljan Mamytbekov málim etti.

«Qarjy kózderine fermerlerdiń qoljetimdiligin arttyrý sekildi birqatar jańa tetikter ashylyp otyr. Baǵdarlamynyń jalpy qarjylandyrý somasy ózgergen joq. Osy qujatta 3 trln. 122 mlrd. teńge qarjy kózdelgen. Onyń 2,6 trln. teńgesi bıýdjettik qarjy kózderinen, al qalǵany qarjy naryqtarynan qamtylmaq. Bul baǵdarlamada 2020 jylǵa deıin sýbsıdııany 4,5-5 esege deıin arttyrýdy josparlap otyrmyz», - dedi mınıstr.

Onyń sózine qaraǵanda, sýbsıdııalardyń jalpy kólemi ózgerip qana qoımaı, ósimdik jáne mal sharýashylyǵy arasyndaǵy úılespeýshilik joıylady. «Ásirese, mal sharýashylyǵyn damytý basymdyǵy sekildi josparlar bekitilgen. Osy ózgeristerde atalǵan basymdyq saqtalyp, ary qaraı damytylyp otyr», - dedi A. Mamytbekov.