«Agrobıznes-2020» baǵdarlamasyn qarjylandyrý jetkiliksiz bolyp otyr - AShM

ASTANA. QazAqparat - «Agrobıznes-2020» baǵdarlamasy aıasyndaǵy quraldardy qarjylandyrý jetkiliksiz bolyp otyr. Bul týraly Parlament Senatynda «EAEO jáne DSU jaǵdaıynda otandyq agrarlyq sektordyń básekege qabilettiligin arttyrý - zańnamalyq retteý jáne is júzine asyrý» taqyrybyndaǵy parlamenttik tyńdaý barysynda Aýyl sharýashylyǵy mınıstri Asyljan Mamytbekov osylaı málim etti.

Mınıstrdiń sózine qaraǵanda, ekonomıkanyń agrarlyq sektorynda sheshilmegen problemalar áli de az emes. Bul rette vedomstvo basshysy salanyń básekege qabilettilik deńgeıi ýaqyt talaptaryna tolyqtaı sáıkes kele bermeıtinin aıtty.

«Qalyptasyp otyrǵan jaǵdaı sebepteriniń biri «Agrobıznes-2020» baǵdarlamasynyń quraldaryn jetkiliksiz qarjylandyrý bolyp tabylady. Máselen, 2013 jyly jetkiliksiz qarjylandyrý qólemi 26 mlrd. teńgeni (14,13%), 2014 jyly 110 mlrd. teńgeni (35,4%), 2015 jyly 115 mlrd. teńgeni (34,4%) quraǵan. Al 2016 jyly bul 127 mlrd. teńgeni (36,8%), 2017 jyly 175,0 mlrd. teńgeni (45,7%) quraıtyn bolady. Nátıjesinde, aýyl sharýashylyǵyna salynǵan ınvestıtsııalar kólemi salystyrmaly túrde tómen bolyp otyr. Máselen, 2015 jylmen salystyrǵanda aýyl sharýashylyǵyndaǵy negizgi kapıtalǵa salynǵan ınvestıtsııalar 167,1 mlrd. teńgeni qurady. Bul ónerkásiptiń negizgi kapıtalyna salynǵan ınvestıtsııalardyń kóleminen 23 esege jáne kólik pen qoımalaýǵa salynǵan ınvestıtsııalardan 7 esege tómen», -dedi A. Mamytbekov.