Agrobank sharýalarǵa 2,5 paıyzben nesıe bere alar edi – Anas Baqqojaev

Elimizde 20 jyldyń ishinde sharýalarǵa arzan paıyzben nesıe beretin júıe qurylmady. Mundaı pikirdi Májiliste ótken dóńgelek ústel otyrysynda depýtat Anas Baqqojaev bildirdi, dep habarlaıdy Kazinform.

«Biz sharýalarǵa 20 jyldyń ishinde arzan paıyzben nesıe beretin júıe qura almadyq. Ony Úkimet moıyndaýy kerek. Qazirgi jaǵdaıdyń bári sharýalardyń qarjyǵa degen qajettiligin qamtamasyz ete almaı otyr. Sondyqtan agrarlyq bank quryp, ony sharýalardyń áleýmettik problemalaryn sheshýge baǵyttaý kerek. Búginde Otbasy banki jumys istep tur. Óte arzan paıyzben nesıe beredi. Sebebi halyqty turǵyn úımen qamtamasyz etý kerek. Qazaqstan damý banki bar. Qajetti iri ınvestıtsııalyq jobalardy qarjylandyrady. Osy eki bankti qurǵan kezde esh suraq joq, al fermerlerdi qarjylandyrý máselesinde Ulttyq bankte de, Úkimette de qarsy dálel paıda bola qalady. Bul durys emes», — dedi Májilis depýtaty.

Onyń atap ótýinshe, elimizdiń azyq-túlik qaýipsizdigin qamtamasyz etý úshin sharýalarǵa arzan jáne uzaqmerzimdi nesıe berý júıesin qurý qajet.

«Ulttyq banktiń aıtary sol baıaǵy áńgime. Degenmen, Ulttyq bank tóraǵasynyń orynbasary búgin agrobanktiń qurylýyna qarsy emes ekenin aıtyp qaldy. Bul — eń negizgi jaýap. Ulttyq bank bizge qarsy bolmasa, endi qalǵany — Úkimet pen Qarjy naryǵyn retteý jáne damytý agenttigi. Bizdiń esepteýimiz boıynsha agrobank 2,5 paıyzben nesıe bere alar edi», — dedi Anas Baqqojaev.