Agrobank qurýda Úkimettiń naqty ustanymy qajet - Jıgýlı Daırabaev
«Bizdiń negizgi mıssııamyzdyń biri - fermer sharýalardyń qarjy máselesin júıeli túrde sheshý. Bul Aýyl partııasynyń saılaýaldy baǵdarlamasynda qazyqtaı qaǵylǵan meje. Meniń alǵashqy depýtattyq saýalym da osy taqyrypqa arnalǵan edi. Biraq Úkimettiń bergen jaýabyna kóńilimiz tolmady. Olar «Agrobank qurylatyn bolsa, ol tıimsiz jumys isteıdi jáne bıýdjetten turaqty túrde aqsha bólinýin talap etedi» dep otyr. Sonda, «Otbasy banki», «Qazaqstan damý banki» de memlekettiń qoldaýynsyz jumys istep otyrǵany ma?! Baspana alamyn degen azamattarǵa bıýdjet tarapynan syıaqy beriledi, «Qazaqstan damý bankiniń» jobalaryna da memleketten tikeleı qarjy bólinedi. Sonda azyq-túlik qaýipsizdigin qamtamasyz etetin agrarly sala úshin qurylatyn agrobanktiń mańyzy atalǵan ekeýinen kem bolǵany ma?», - dedi J. Daırabaev Májilistiń jalpy otyrysynda Úkimet pen Ulttyq bankke joldaǵan saýalynda.
Osy oraıda ol Agrobanktiń aýyl sharýashylyǵyna kerek ekenin, onyń tıimdi ekenin áli de dáleldeıtinin aıtty.
«Máselen, halyqaralyq tájirbıege súıensek Frantsııada «Kredıt Agrıkoı», Belarýsta «Belagroprombank», Reseıde «Rosselhozbank», Qytaıda Agricultural Bank of China, Ózbekstanda «Agrobank» jáne basqa da elderde salalyq agrarlyq bank jumys isteıdi. Osyǵan qatysty Úkimet pen Ulttyq banktiń naqty ustanymy qajet. Óıtkeni eńbek adamdarynyń talabyn sózbuıdaǵa salýǵa bolmaıdy, Úkimet jaǵynan osy máseleni sheshýde tabandylyq kórsetetin kez keldi. Joǵarydaǵy usynystardy eskere otyryp, kóterilgen másele boıynsha zańnamada belgilengen merzimde jaýap berýińizdi suraımyz», - dedi depýtat.
