AgriX: Egistik ónimdiligin arttyrýǵa kómektesetin JI platforma
ASTANA. KAZINFORM — Eginniń bitik shyǵýy tek aýa raıyna emes, sýdyń mólsherine, topyraqtyń qunaryna jáne jerdi durys kútip-baptaýǵa da baılanysty. Endi osynyń bárin jasandy ıntellekt arqyly eseptep, sharýalarǵa naqty usynys berýge bolady.
Qorqyt ata atyndaǵy Qyzylorda ýnıversıtettiń ekinshi kýrs stýdenti Nurdáýlet Dúzenov aýyl sharýashylyǵyna arnalǵan AgriX atty ıntellektýaldy platformany ázirlegen.
Bul júıe egistik týraly derekterdi taldap, sýarý men tyńaıtqysh qoldanýǵa qatysty usynystar beredi. Platforma dıqandardyń jumysyn jeńildetip, resýrsty únemdeýge kómektesýi múmkin.
Nurdáýlet Dúzenov Jibek Joly telearnasynyń «Búgin.LIVE» baǵdarlamasyna tikeleı baılanysqa shyǵyp, suqbat berdi.
AgriX — fermerlerge egistik alqabynyń jaǵdaıyn baǵalap, durys sheshim qabyldaýǵa kómektesetin júıe. Fermer kartadan jer telimin belgilep, qandaı daqyl ekkenin kórsetedi. Al platforma topyraq ylǵaldylyǵyn, aýa raıyn jáne spýtnıktik derekterdi taldaıdy. Sonyń negizinde sýarý, tyńaıtqysh engizý jáne egistikti kútip-baptaý boıynsha usynystar beredi.
— Bul jobany ázirleýge týystarymnyń basynan ótken jaǵdaı sebep boldy. Olardyń júgeri alqaptarynda ónimdilik tómendegen soń, men máseleni zertteýge kiristim. Topyraq quramyn, aýa raıyn jáne sýarý erekshelikterin taldaıtyn qural qajet ekenin túsinip, aýyl sharýashylyǵy ónimdiligin arttyrýǵa arnalǵan AgriX platformasyn ázirlep shyǵardym, — dedi ol.
Ázirleýshiniń aıtýynsha, júıeniń tıimdiligi tájirıbe júzinde de baıqalǵan. Máselen, Qyzylorda oblysyndaǵy júgeri alqabynda júrgizilgen synaq kezinde ónimdilik gektaryna 6–7 tonnadan 10,2 tonnaǵa deıin artqan. Sharýalar júıeniń usynystaryna súıenip, mol ónim alǵan.
— Platformaǵa ınternetke qosylǵan kez kelgen qurylǵydan kirýge bolady. Ol úshin fermer tirkelip, kartadan óz óńiri men egistik alqabyn tańdaýy kerek. Qalǵan aqparatty júıe ózi usynady, — dedi AgriX jobasynyń avtory.
Qazir platforma tegin qoljetimdi. Ázirleýshi ony jetildirý jumystaryn jalǵastyryp jatyr. Bolashaqta aqyly nusqasyn iske qosý múmkindigi de qarastyrylyp otyr.
Sonymen qatar jas ázirleýshi sý resýrstaryn únemdeýge arnalǵan jańa júıe jasaýdy josparlap júr. Onyń maqsaty — egistikke qajetti sý mólsherin eseptep, sýdy tıimdi paıdalanýǵa kómektesý. Qazir bul baǵytta zertteý júrgizip jatyr.
Aıta keteıik, jas zertteýshiler elektr jelilerine arnalǵan JI jáne qaterli isikti emdeıtin nanogel ázirlep jatyr.
