Agrarshylarǵa arzandatylǵan dızel otyny jetkizilip jatyr – AShM

NUR-SULTAN. QazAqparat – Agrarshylarǵa arzandatylǵan dızel otyny bekitilgen kestege sáıkes jetkizilip jatyr. Bul týraly QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Bıyl aqpan-maýsym kezeńine egis jumystaryn júrgizýge 400 myń tonna kóleminde dızel otyny bólindi. Bul ótken jylmen salystyrǵanda 20 myń tonnaǵa artyq. Jetkizý, saqtaý jáne satý boıynsha oblys operatorlarynyń shyǵystaryn eskere otyryp, aýyl sharýashylyǵy taýaryn óndirýshiler úshin ortasha baǵa lıtrine 200 teńgeni quraıdy. Al naryqtaǵy baǵa lıtrine 230 teńgege deıin jetedi. Bul - ortasha alǵanda naryqtaǵy baǵadan 15 paıyzǵa arzan. Qazirgi ýaqytta bekitilgen kestege sáıkes agrarshylarǵa dızel otyn jóneltý júzege asyp jatyr», - dedi mınıstr ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, tuqym sebý jospary 100 paıyz júzege asyryldy.

Saraptamaǵa 1,5 mln tonna jazdyq daqyldar tuqymy kelip tústi. Onyń 1,3 mln tonnasy nemese 90 paıyzy tekserildi.

«Sońǵy bes jylda tuqym óndirýshilerdi egis tehnıkasymen qamtamasyz etý 70-ten 89,4 paıyzǵa deıin, egin jınaý tehnıkasymen 80-nen 92 paıyzǵa deıin, tuqym tazalaý tehnıkasymen 63-ten 81,4 paıyzǵa deıin óskenin atap ótken jón», - dedi Erbol Qarashókeev.