Agrarlyq ýnıversıtetter Ǵylym mınıstrligine berilýi múmkin

ASTANA. QazAqparat – Premer-Mınıstr Álıhan Smaıylov Májilis depýtattarynyń saýalyna joldaǵan jaýabynda agrarlyq ýnıversıtetterdiń qalaı transformatsııalanyp jatqany týraly málimet berdi, dep habarlaıdy QazAqparat tilshisi.

«Ulttyq agrarlyq ǵylymı-bilim berý ortalyǵy» kommertsııalyq emes aktsıonerlik qoǵamynyń qyzmetin transformatsııalaý baǵytynda jumys júrgizilip jatyr. Bul transformatsııa Ulttyq agrarlyq ǵylymı-bilim berý ortalyǵynyń óńirlik ǵylymı jáne tájirıbelik uıymdaryn úsh agrarlyq joǵary oqý ornynyń quramyna berýdi kózdeıdi. Olar: «Qazaq ulttyq agrarlyq zertteý ýnıversıteti» KeAQ, «S. Seıfýllın atyndaǵy Qazaq agrotehnıkalyq zertteý ýnıversıteti» KeAQ, «Jáńgir han atyndaǵy Batys Qazaqstan agrarlyq-tehnıkalyq ýnıversıteti» KeAQ», - delingen jaýapta. https://www.parlam.kz/kk/mazhilis/question-details/19326

Álıhan Smaıylovtyń aıtýynsha, Aýyl sharýashylyǵy mınıstrligi osy is-sharalardy aıaqtaǵannan keıin atalǵan joǵary oqý oryndaryn Ǵylym jáne joǵary bilim mınıstrligine berý máselesi qaralady.