Agrarlyq ýnıversıtet rektory A.Kúrishbaev Astanada birtutas agrarlyq bilim-ǵylym ortalyǵyn qurýdy usyndy
Bul usynysyn JOO rektory keshe, Astana ákimi Imanǵalı Tasmaǵambetovtyń qatysýymen ótken «Nur Otan» partııasy Astana qalalyq fılıalynyń kezekten tys HVІ konferentsııasy barysynda jasady.
Onyń aıtýynsha, barlyq damyǵan elderde ýnıversıtet ǵylym men bilimniń birtutas júıesi bolyp tabylady. Bul ǵylymı bilimderdi alý jáne taratý, ǵylymı jetistikterdi óndiriske engizý úrdisterin úılestirýge múmkindik berip otyr.
«Bizde agrarlyq ǵylymı-zertteý ınstıtýttary men JOO-lar ǵylym men bilimniń ajyramas qaǵıdatyn buza otyryp, áli kúnge deıin bir-birinen bólektenip jumys isteıdi. Osyǵan oraı, bizdiń jetekshi ǵalymdarymyz ýnıversıttiń jáne óńirdegi iri ǵylymı-zertteý ınstıtýttardyń, sonyń ishinde Baraev atyndaǵy Astyq sharýashylyǵy ǵylymı-zertteý ınstıtýtynyń bazasynda birtutas bilim-ǵylym ortalyǵyn qurý bastamasymen shyqty. Bul stýdentterdi ǵylymı zerthanalar men tájirıbelik sharýashylyqtarda oqytý arqyly bilim berýdiń sapasyn arttyryp qana qoımaı, elde ınnovatsııalyq qurylymnyń damýy úshin jaǵymdy jaǵdaılar jasaıdy. Osy sátti paıdalana otyryp, konferentsııaǵa qatysýshy májilis depýtattarynan, úkimet múshelerinen Astanada agrarlyq bilim-ǵylym ortalyǵyn qurý boıynsha usynysymyzdy qoldaýdy suraımyn», - dep atap ótti A.Kúrishbaev.
Agrarlyq ýnıversıtettiń rektory sondaı-aq, S.Seıfýllın atyndaǵy QazATÝ ǵylymı-zertteý dárejesin alýǵa árekettenip jatqandyǵyn jetkizdi. Jýyrda ýnıversıtet bazasynda «Astana» energııany únemdeý jáne bilimdý taratý ortalyǵy quryldy. Onyń maqsaty bilim, ǵylym jáne óndiristi shoǵyrlandyrý ǵana emes, energııa resýrstaryn únemdeý boıynsha qalanyń problemalaryn sheshý bolyp tabylady.
«Bul - partııamyzdyń Astana qalalyq fılıalynyń tóraǵasy, qala ákimi Imanǵalı Nurǵalıuly Tasmaǵambetovtyń turǵyndarmen jýyrda bolǵan kezdesýinde aıtqan «Aqyldy qalany» qalyptastyrý jolyndaǵy naqty qadam bolyp tabylady», - dep túıindedi A.Kúrishbaev.
