Agrarlyq týrızmdi damytýǵa aýyl jastary jumyldyrylmaq
«Respýblıkalyq «Aýyl - el besigi» arnaıy jobasy aıasynda Qazaqstan halqy Assambleıasy «Jańǵyrǵan aýyl» jobasyn ázirledi. Ol joba Sáken Seıfýllın atyndaǵy Qazaq agrotehnıkalyq ýnıversıtetimen birge iske asyrylmaq. Jobaǵa jańa tehnologııalardy alǵa jyljytý, aýyl sharýashylyǵy mamandaryn daıyndaý úshin JOO kooperatsııasyn qamtamasyz etý, jetekshi aýyl sharýashylyǵy kásiporyndarynda agrarlyq týrızmdi damytý úshin aýyl jastary ishinen mamandardy daıarlaý jumystary enedi», - dedi QHA Keńesiniń keńeıtilgen otyrysynda QHA tóraǵasynyń orynbasary - hatshylyq meńgerýshisi Leonıd Prokopenko.
Onyń aıtýyna qaraǵanda, óz kezeginde QHA Qoǵamdyq kelisim mekemeleri aýdandar men okrýgterde jol kartasy sheńberinde tehnologııalardy damytý jumystaryn ary qaraı jalǵastyra beredi.
Eske sala ketsek, Memleket basshysy Nursultan Nazarbaev Qazaqstan halqyna Joldaýynda aýyldyq jerdi qoldaý jáne jas urpaqty tárbıeleý jumysy boıynsha tyń bastamalar kótergen bolatyn. Sondaı jobalardyń biri - «Aýyl - el besigi».
Óz kezeginde QR Aýyl sharýashylyǵy mınıstrligi «Rýhanı Jańǵyrý» baǵdarlamasynyń «Aýyl - el besigi» atty jańa arnaıy jobasy aıasynda birneshe negizgi ındıkatordy bólip, aýyldarda jas bıznesmenderdiń sanyn arttyrýdy kózdep otyr.
