Agrarlyq sektor Qazaqstannyń aldaǵy ekonomıkasy ósiminiń negizgi draıveri bolýy kerek - E. Dosaev
ASTANA. QazAqparat - Agrarlyq sektor Qazaqstannyń aldaǵy ekonomıkasy ósiminiń negizgi draıveri bolýy kerek. Bul týraly búgin Parlament Májilisindegi Daǵdarysqa qarsy sharalarǵa arnalǵan Úkimet saǵatynda QR Ulttyq ekonomıka mınıstri Erbolat Dosaev aıtty.
«Osyǵan baılanysty 2016 jyl boıy Avstralııa men Brazılııa elderiniń tájirıbesi negizinde Dúnıejúzilik saýda uıymynyń «jasyl sebet» sharalary arqyly aýyl sharýashylyǵyn damytýǵa basa nazar aýdarylady. Bul rette agroónerkásip keshenine jańa tehnologııalar engizý men ınfraqurylym qurý sharalaryna basymdyq beriledi. Memlekettik qoldaýdyń tıimdiligin arttyrýdyń arqasynda kelesi jyly sýbsıdııalaýdyń qoldanystaǵy júıesin reformalaý, ósimdik sharýashylyǵy salasynda saqtandyrýdy jetildirý kózdeledi», deıdi E. Dosaev.
Onyń aıtýynsha, shaǵyn jáne orta bıznesti qoldaý maqsatynda Úkimet jaqynda óńirlerge kredıtter boıynsha stavkalardy sýbsıdııalaýǵa qosymsha qarajattar bólý týraly sheshim qabyldaǵan. Bul úshin aınalym qarajattaryn tolyqtyrýǵa 7,2 mlrd teńge bólinip otyr, al 2016 jyly atalǵan maqsattarǵa 7 mlrd teńge qarastyrylady. «Osynyń arqasynda ekonomıkany kredıtteýge 202 mlrd tartýǵa múmkindik týady. Al óndirilgen ónim 418 mlrd teńgege artatyn bolady», dedi E. Dosaev.
