Agrarlyq salaǵa ınnovatsııalyq tehnologııa qajet
ASTANA. QazAqparat - Senatorlardyń S.Seıfýllın atyndaǵy Qazaq agrotehnıkalyq ýnıversıtetiniń (QazATÝ) aýyl sharýashylyǵy salasynyń ǵalymdarymen kezdesýinde aýyl sharýashylyǵy ǵylymdaryn damytý jáne agrarlyq sala úshin mamandar daıarlaý máseleleri talqylandy.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Sergeı Plotnıkov kezdesýdi asha kelip, Memleket basshysy N.Á.Nazarbaevtyń «Qazaqstan joly - 2050: Bir maqsat, bir múdde, bir bolashaq» Joldaýynda agroónerkásip keshenin ınnovatsııalyq damý jolyna kóshirý maqsatyn alǵa qoıǵanyn eske saldy.
S. Plotnıkov salanyń bolashaǵy tehnologııalyq jańǵyrtý jáne ınnovatsııada ekenin, ony engizý úshin ózimizdiń joǵary deńgeıde damyǵan ǵylymı zertteýlerimiz kerek ekenin atap ótti. Sonymen birge taldaý kórsetip otyrǵandaı, agrarlyq bilim berý men ǵylym deńgeıi jaqsartýdy qajet etedi. «Aýyl sharýashylyǵyndaǵy zertteýler boıynsha biz aldyńǵy qatardaǵy álemdik derjavalardan eleýli túrde keıin qaldyq, kóptegen mamandardy jáne tutas ǵylymı baǵyttardy joǵalttyq, - dep atap ótti senator. Qazirgi bilim berý bazasy qatty eskirdi, mamandar jetispeýshiligi seziledi».
Senat komıtetiniń jetekshisi ınvestıtsııanyń jalpy kólemindegi úlesi 2,3 paıyzdan aspaıtyn aýyl sharýashylyǵyn qarjylandyrýdy ulǵaıtý qajettigine nazar aýdardy. 2020 jyly salany memlekettik qoldaý kólemi 4,5 esege ósýi tıis.
Óndiris kólemin arttyrý jáne onyń ózindik qunyn tómendetý esebinen óndiristiń tıimdiligin ulǵaıtý mańyzdy basymdyq bolýy tıis. S. Plotnıkovtyń aıtýynsha, bul másele elimizdiń agrarlyq salasy óte qajet etip otyrǵan ınnovatsııalyq tehnologııalardy engizýmen tyǵyz baılanysty. Qazirgi zamanǵy ǵylymı jáne bilim berý tehnologııalaryn engizý salany kótere alatyn joǵary bilikti mamandar áleýetin arttyrý úshin múmkindikter ashýy tıis, dedi S. Plotnıkov.
Otyrysta aýyl sharýashylyǵy mınıstriniń orynbasary Ermek Kósherbaev, QazATÝ basqarma tóraǵasy Aqylbek Kúrishbaev, Senat depýtattary Serik Bilálov jáne Qýanysh Aıtahanov sóz sóıledi.
Shara aıasynda parlamentshiler QazATÝ-dyń ǵylymı jetistikteriniń kórmesinde boldy, Qazaqstan-Belorýs mamandar daıarlaý jáne qaıta daıarlaý ortalyǵyn, Qazaqstan-Qytaı aýyl sharýashylyǵyn mehanıkalandyrý ortalyǵyn, etti tájirıbelik túrde óńdeý tsehyn jáne Aýyl sharýashylyǵy bıotehnologııasy ǵylymı-zertteý ınstıtýtyn aralady.
