Agrarlyq salada ınnovatsııalyq jobalar qanat jaımaq- jas agronom
Qyzylorda oblysy Jalaǵash aýdanyndaǵy «Eńbek-jer» jaýapkershiligi shekteýli seriktestiginiń bas agronomy Altynbek Isabaev QazAqparat tilshisine óz pikirimen osylaısha bólisti. Ol búgin Astanada ótken Jastar jylynyń saltanatty ashylý rásimine Qyzylorda oblysynyń atynan qatysqan edi.
«Memleket basshysy «Aýyl - el besigi» jobasy aıasynda ınfraqurylymdy damytyp, jergilikti jerlerdiń kadrlyq áleýetin kúsheıtýdi tapsyrdy. Budan burynǵy jyldarda elimizde «Dıplommen aýylǵa» baǵdarlamasy júzege asyrylyp kele jatqany belgili. Ol óz tıimdiligin kórsetip, qanshama jas mamannyń aýyldyń áleýmettik-ekonomıkalyq áleýetin kóterýge úles qosýyna negiz qalady.
Men búginde seriktestikte bas agronom qyzmetin atqaramyn. Shynyn aıtqanda, burynǵy jyldarda joǵary bilimdi jas mamandardyń aýylǵa oralý jaǵdaıy tómendep ketken edi. «Dıplommen aýylǵa» baǵdarlamasy sol túıitkildiń túıini sheshilýine úlken septigin tıgizip otyr», - dedi Altynbek Isabaev.
Onyń aıtýynsha, ózi qyzmet jasaıtyn «Eńbek-jer» JShS - Syr óńirindegi irgeli sharýashylyqtyń biri. Negizinen kúrish sharýashylyǵyna beıimdelgen. Jyl saıyn 1500 gektarǵa jýyq alqapqa kúrish egiledi. Odan gektaryna ortasha eseppen alǵanda 60 tsentnerden ónim jınalady.
«Men seriktestikte eńbek etkenime bıyl bes jyldan asty. Aǵa býyn ókilderinen óz tájirıbemdi molaıtý baǵytynda kóp tálim alyp júrmin. Elbasy búgingi júzdesý barysynda agrarlyq salany damytý baǵytynda kóptegen oılarymen bólisti. Jastardy aýyl sharýashylyǵymen aınalysýǵa qyzyqtyra bilý qajettigin aıtty. Jalpy, agrarlyq sala damyǵan elderde joǵary ónimdi ári ınnovatsııalyq salalardyń biri sanalady. Onda tsıfrlyq tehnologııalar men robottandyrylǵan keshender belsendi qoldanylady. Qýanarlyǵy, búginde ońdy ózgerister bizdiń ómirimizde de keńinen qanat jaıyp keledi», - dedi Altynbek Isabaev.
Ol Jastar jylynyń ashylý saltanaty barysynda Memleket basshysy búgingi býyn ókilderine baǵyttalǵan kóptegen oı-tolǵamyn bildirgenine toqtaldy.
«Elbasy óz sózinde «Qazirgi ekonomıkadaǵy básekelestik jańa tehnologııa oılap taýyp, onyń tájirıbede keńinen qoldanylýyna baılanysty» dedi. Rasynda, búginde álemde jas kezinen tanylǵan tulǵalar az emes. Prezıdent atap ótkendeı, «Feısbýkti» Mark Tsýkerberg 19 jasynda, «Maıkrosofty» Bıll Geıts 20 jasynda, «Apple» kompanııasyn Stıv Djobs 21 jasynda qurǵan. Osy oraıda ol bıznespen aınalysýǵa nıetti jastarǵa úlken qoldaý jasalatynyna nazar aýdardy. Úkimet tarapynan kórsetilgen tıisti qoldaýdyń nátıjesinde búginde elimizde jas kásipkerler sany artyp keledi. Bul rette Nursultan Ábishuly Úkimetke «Bıznes-2020» jol kartasy aıasynda jas kásipkerler úshin grant boıynsha bólinetin qarjy kólemin eki ese arttyrýdy tapsyratynyn aıtyp ótti. Bul búgingi býyn ókilderine jasalǵan erekshe qamqorlyq dep túsingenimiz durys», - dedi Altynbek Isabaev.
