Agrarlyq salada ǵalymdar ǵylymı jumystaryna syıaqy alýy kerek - Tóleýtaı Rahymbekov

NUR-SULTAN. QazAqparat – Ǵalymdar óziniń ǵylymı jumystaryna syıaqy alýy kerek. Bul týraly onlaın-konferentsııada «Aýyl» partııasy tóraǵasynyń birinshi orynbasary Tóleýtaı Rahymbekov málim etti, dep habarlaıdy QazAqparat tilshisi.

«Kommertsııalandyrý – bul termın qazirgi kezde bizdiń qoǵamdyq ómirimizde óziniń naqty ornyn alyp otyr. Kommertsııalandyrýdyń qajet ekenine daý joq, alaıda sózden iske kóshý úshin biraz sharýany eńserý kerek. Kommertsııalandyrýdyń ishindegi eń basty tetikteriniń biri – ol «roıaltı júıesi», - dedi T. Rahymbekov AÓK salasynda ǵylymı jetistikterdi kommertsııalandyrý taqyrybyndaǵy konferentsııada.

Osy oraıda ol qazirgi kezde án men basqa da shyǵarmalardyń avtorlaryna «avtorlyq syıaqy» tetigi belsendi paıdalanylyp kele jatqanyn eske saldy.

«Dál osyndaı qadam ǵylymda da eskerilgen, ıaǵnı ǵalym óziniń ǵylymı jumysyn paıdalaný nátıjesinen syıaqy alýy kerek. Agrarlyq ǵylymı- bilim berý ortalyǵy júıesinde 2009 jyly alǵashqy ońtaıly tájirıbe paıda bolyp, sol kezde Baraev atyndaǵy ǵylymı-óndiristik ortalyq bazasynda 32 shart bekitilip, aýyl sharýashylyǵy taýarlaryn óndirýshiler 108 mln teńge tólegen edi. Bul shamamen aýyl sharýashylyǵy taýarlaryn óndirýshiler sytyp alǵan tuqym qunynyń 1-1,5 paıyzy shamasynda», - dedi T. Rahymbekov.

Onyń sózine qaraǵanda, zańnama boıynsha atalǵan somanyń 30 paıyzy tikeleı ǵalymdarǵa, ıaǵnı suryptardyń, tuqym men tehnologııa avtorlaryna baǵyttalýy tıis.

«Nátıjesinde, osy ǵylymı-óndiristik ortalyq ǵalymdaryna 32 mln teńgeden astam tólendi», - dedi ol.