Agrarlyq salada adamı faktor áserinen kóptegen qatelikter jiberiledi - Aqylbek Kúrishbaev
«Qaǵaz júzindegi ádemi baıandamalardyń aýyldaǵy jaǵdaımen sáıkes kelmeıtinin ańǵarý qıyn emes. Biz jınalǵan ónimniń anyq kólemin, tuqymnyń shynaıy sapasyn, zııankester men aýrýlardyń taralý mólsherin, egin sebý men jınaý jumystarynyń dál merzimin naqty bilmeımiz, al zamanaýı agrotehnologııalardy engizý boıynsha keıde damyǵan elderden de asyp ketemiz. Mal sharýashylyǵynda janýarlar týraly málimetterdi tirkeý jumystarynyń negizgi bóligi áli de qaǵaz nusqada jınalady, keıinnen olar derekter bazasyna qolmen engiziledi. Sondyqtan adamı faktor áserinen kóptegen qatelikter oryn alady», - dedi depýtat Úkimet basshysy Asqar Mamınniń atyna joldaǵan saýalynda.
Onyń paıymynsha, mundaı olqylyqtardyń birneshe sebebi bar. Birinshiden, aqparat berýshiniń derekterdiń durystyǵy úshin jaýapkershiligi tómen. Ekinshiden, jergilikti ákimderdiń jumysyn baǵalaýdy statıstıka derekterine táýeldi etý – aýyldaǵy jaǵdaı týraly jalǵan aqparattar berýge jol ashady. Úshinshiden, statıstıkalyq málimetterdiń anyqtyǵy men shynaıylyǵyn arttyrý baǵytynda qazirgi zamanǵy tsıfrlyq tehnologııalar qajetti deńgeıde paıdalanylmaı otyr.
«Osyndaı burmalanǵan aqparattar «qısyq aına» áserin týdyratynyn jáne memlekettik organdardyń mańyzdy sheshimder qabyldaýyna negiz bolatynyn moıyndaý kerek. Munyń sońy nege alyp keledi? Eń aldymen, memlekettik josparlaýdyń durys jasalmaýyna, qarajattyń dál bólinbeýine áser etedi. Muny biz ıgerilmegen bıýdjet qarjysynyń jáne olardy maqsatsyz paıdalanýdyń kóleminen jıi baıqaımyz. Mal sharýashylyǵynda janýarlar týraly málimetterdi burmalaý sýbsıdııalardy zańsyz alýǵa jol ashady. Memleketten qarjylaı kómek alýdyń belgilengen talaptaryna sáıkes bolýy úshin, aýylsharýashylyq taýar óndirýshileriniń keıbiri ótirik-shyndy aqparatty qosyp, keıde ótip ketken kúnmen janýarlar týraly málimetterge túzetýler men ózgerister engizedi. Eń oǵashtyǵy, aýylsharýashylyq janýarlaryn esepke alý memlekettik júıesinde osyndaı olqylyqtarǵa jol berilip otyr», - dedi A. Kúrishbaev.
Osy oraıda ol qalyptasqan jaǵdaıdy túzetý úshin tıisti sharalardy qabyldaýdy usyndy. Egin sharýashylyǵynyń jaı-kúıi týraly obektıvti derekter alý úshin, tsıfrlandyrý múmkindikterin barynsha paıdalaný kerek. Barlyq damyǵan elderde jerdi qashyqtyqtan zondtaý tehnologııasyn engizý aldynda árbir óńir úshin qoldanylatyn aeroǵaryshtyq sýretterdiń maǵynasyn ashý ádistemesi ázirlenedi. Bul turǵyda aýyl sharýashylyǵynyń tsıfrlandyrý máselesimen Esep komıteti muqııat aınalysýy kerek.
«Mal sharýashylyǵynda adamı faktor yqpalyn tolyqtaı joıa otyryp, janýarlardy esepke alý men veterınarlyq qujattamany júrgizýdiń búkil júıesin tsıfrlyq formatqa kóshirý mańyzdy. Mundaı ázirleme S. Seıfýllın atyndaǵy Qazaq agrotehnıkalyq ýnıversıtetinde bar jáne ol ótken jyly Senatta tanystyryldy. Bul damyǵan elderde qoldanylatyn tehnologııa. Ony pılottyq rejımde jekelegen óńirlerde synaqtan ótkizip, óndiriske tezirek engizý qajet. Agroónerkásiptik keshende tsıfrlyq tehnologııalardy paıdalaný aýyl sharýashylyǵynyń jaǵdaıy týraly derekterdiń naqtylyǵyn arttyryp qana qoımaı, myńdaǵan ákimdik qyzmetkerlerin olarǵa tán emes ártúrli málimetter men aqparattardy jınaý jumysynan bosatyp, al elimizdegi veterınar mamandardy qaǵazbastylyqtan aryltyp, olardyń barlyǵyna óziniń negizgi jumysymen aınalasýǵa múmkindik beredi», - dedi senator.
