«Agrarlyq nesıe korporatsııasy» kóktemgi egis jumystaryna 24 mlrd. teńge nesıe beredi
ASTANA. 13 sáýir. QazAqparat - «Agrarlyq nesıe korporatsııasy» AQ kóktemgi egin egý jumystaryn nesıeleý maqsatynda elimizdegi aýylsharýashylyq taýar óndirýshilerine jalpy somasy 24 mlrd. teńgeden asa nesıe berdi.
Bul qarjyǵa Aqmola, Aqtóbe, Qaraǵandy, Qostanaı jáne Soltústik Qazaqstan oblystaryndaǵy sharýa qojalyqtary aǵymdaǵy naýqan kezinde 1 mln. 300 myń gektar jerge kóktemgi egin-egý jumystaryn júrgizbek. Bul týraly kompanııanyń baspasóz qyzmetinen habarlandy.
Sonymen qatar, agroónerkásip kesheni sýbektilerindegi kóktemgi egin egý jáne kúzgi jıyn-terim jumystaryn nesıeleý baǵdarlamasy boıynsha, Korporatsııa bıylǵy jyly atalǵan sharaǵa respýblıkalyq bıýdjetten 39 mlrd. teńge bólýdi josparlap otyr. Budan bólek, korporatsııadan kredıttik seriktestikter júıesi arqyly elimizdiń 13 oblysyndaǵy 285 aýyl sharýashylyq taýar óndirýshilerine 2 mlrd. 230 mln. teńge nesıe berildi. Qazirgi kúni korporatsııaǵa Agroónerkásip kesheni sýbektilerindegi kóktemgi egin egý jáne kúzgi jıyn-terim jumystaryn nesıeleý baǵdarlamasy men kredıttik seriktestikter júıesi arqyly kóktemgi egin egý jumystaryn júrgizýge jalpy somasy 26 mlrd. 615 mln. teńgeden asa qarjyǵa ótinimder kelip túsken
«Budan ózge, kredıttik seriktestikter júıesi arqyly kóktemgi egin egý jáne kúzgi jıyn terim jumystaryn júrgizý úshin nesıe ortasha 8-9% jyldyq syıaqy stavkasy boıynsha, negizgi qarajat alýǵa - 9 jylǵa deıin, aınalym qarajatyn toltyrýǵa - 2 jylǵa deıin beriledi. Kredıt boıynsha mindetti qamtamasyz etý: jyljymaly jáne jyljymaıtyn múlik, mal basy, paıdalanylatyn jer jáne taǵy basqa. Qamtamasyz etýdiń kepil quny qaryz somasyn 120% kem emes jabýy tıis. Ótken jyly respýblıkalyq bıýdjet qarjysy esebinen kóktemgi egin egý jáne kúzgi jıyn terim jumystaryn nesıeleý aıasynda Korporatsııa tarapynan 800 myń ga asa aýmaqqa kóktemgi egin egý jáne kúzgi jıyn terim jumystaryn júrgizý úshin 19 mlrd. asa teńgeniń qarjysy berildi», - delingen baspasóz habarlamasynda.
