Agrarlyq mamandyqtar boıynsha bitirgen túlekterdiń tek 68% ǵana jumysqa ornalasady
ASTANA. QazAqparat - Agrarlyq sektorda 2 500-den astam maman jetispeıdi. Bul týraly Parlament Senatynyń jalpy otyrysynda Premer-Mınıstr Baqytjan Saǵyntaevtyń atyna joldaǵan depýtattyq saýalynda senator Álı Bektaev málim etti, dep habarlaıdy QazAqparat.
«Ekonomıkadaǵy qaı salanyń bolmasyn damýy kadrlarǵa, sonyń ishinde ár baǵyt boıynsha jumys jasaıtyn mamandarǵa tikeleı baılanysty. Agrarlyq sektordyń qarqyndy damýy da sala mamandarynyń qolynda ekendigi belgili. Ókinishke qaraı, myńdaǵan túlek arnaýly oqý oryndaryn bitirip jatqanymen, aýyl sharýashylyǵynyń bilimdi jáne bilikti mamandarmen qamtylýy áli de tómen, qabyldanǵan sharalar mardymsyz», - dep toqtaldy senator.
Onyń sózine qaraǵanda, búgingi tańda aýyldaǵy mamandardyń orta jasy 50-den asqan, al veterınarlar boıynsha 58-60 jasty quraıdy. Agrarlyq sektorda 2 500-den astam maman jetispeıdi. Jyl saıyn oqý bitirgen 5 000-ǵa jýyq túlektiń basym kópshiligi aýylǵa barmaı, óz mamandyǵyna saı kelmeıtin túrli jumystarda júr, bolmasa jumyssyz.
QR Bilim jáne ǵylym mınıstrliginiń málimetine súıensek, agrarlyq mamandyqtar boıynsha bitirgen túlekterdiń tek 68% ǵana jumysqa ornalasady eken, ıaǵnı jyl saıyn memleket esebinen oqytylǵan 670-ten astam túlek jumyssyz qalady.
«Aýyl sharýashylyǵy mamandyqtaryn jastardyń kópshiligi áıteýir bir dıplom alý úshin tańdaıtyn sııaqty. Saraptamalar kórsetkendeı, agrarlyq joǵary oqý oryndaryndaǵy stýdentterdiń 40%-ǵa jýyǵy qalalyqtar, al 70%-dan astamy qyzdar. Qala balalary men qyzdardyń mártebesin tómendetkimiz kelmeıdi. Biraq erteń olardyń basym bóligi egis alqaptarynda júrip, egin egýge, mal baǵýǵa barmaıtyny aıdan anyq. Onyń ústine, aýyldaǵy mamandardyń jalaqysy mardymsyz, áleýmettik problemalary kóp», - dedi Bektaev.
Onyń paıymynsha, aýyl sharýashylyǵy mamandyqtarynyń granttaryn bólý de durys jolǵa qoıylmaǵan. Agrarlyq ýnıversıtetter QR Aýyl sharýashylyǵy mınıstrligine qarasty bolǵanymen, olarǵa memlekettik tapsyrysty QR Bilim jáne ǵylym mınıstrligi bóledi. Granttardy bólý kezinde mamandarǵa qajettilik, oqý oryndardyń materıaldyq bazasy, pedagogtardyń biliktiligi eskerilmeıdi. Mysaly, agrarlyq mamandyqtar boıynsha 2018-2019 oqý jylyna qarastyrylǵan 2077 memlekettik granttyń jartysyna jýyǵy negizinen gýmanıtarlyq, qurylys, baılanys, tehnıkalyq joǵary oqý oryndaryna bólingen.
Álı Bektaevtyń atap ótýinshe, agrarlyq mamandyqtardy memlekettik tapsyrys arqyly qazaqstandyq joǵary oqý oryndaryna ornalastyrý, memlekettik granttardy bólý quqyǵyn QR Aýyl sharýashylyǵy mınıstrligine berý kerek.
«Elimizdegi agrarlyq sektorǵa mamandar daıyndaıtyn barlyq joǵarǵy jáne arnaýly orta oqý oryndarynyń materıaldyq bazasyn, ondaǵy oqytý qural-jabdyqtarynyń jaǵdaıyn tereń saraptamadan ótkizip, zamanaýı qurylǵylarmen qamtamasyz etý, al stýdentterdi praktıkamen qamtý úshin oqý oryndaryn iri agrokompanııalarǵa bekitý qajet. Aýylsharýashylyq mamandyqtaryna aýyl mektepteriniń túlekterin kóptep qabyldaý maqsatynda olarǵa jeńildikter berýdiń qosymsha sharalaryn qarastyrý, ol úshin aýyl balalaryna bólinetin kvotanyń kólemin 50%-ǵa deıin jetkizý mańyzdy», - dedi ol.
