Agrarlyq qolhattar salaǵa 100 mlrd teńge tartýǵa jol ashady
ASTANA. QazAqparat - Elektrondy agrarlyq qolhattardy engizý 2021 jylǵa qaraı agroónerkásiptik keshenge 100 mlrd teńge tartýǵa múmkindik beredi. Bul týraly búgin Ádilet mınıstrliginde Zań jobalaý qyzmeti máseleleri jónindegi vedomstvoaralyq komıssııanyń otyrysynda Májilis depýtaty Sergeı Zvolskıı málim etti, dep habarlaıdy QazAqparat.
Aıta keteıik, otyrys barysynda «Agrarlyq qolhattar týraly» zań jobasy men zańnamaǵa ilespe túzetýler qarastyryldy.
«Nesıe alýǵa tosqaýyl bolatyn negizgi problemalardyń biri - ol AÓK sýbektileriniń álsiz ári ónimdiligi tómen kepildik bazasy. Ásirese, bul problema shaǵyn jáne orta bıznes úshin ózekti. Osyǵan baılanysty jańa tetikti engizýdi usynamyz, ıaǵnı elektrondy agrarlyq qolhattardy eskerip otyrmyz. Atalǵan qarjylyq tetik salany bıýdjetten tys qarjylandyrý kólemin arttyryp, kásipkerlerdi qosymsha qaryz alý kózderimen qamtamasyz etýge múmkindik beredi. Sonymen qatar, agrarlyq qolhattar aýyl sharýashylyǵynda kepildik massasynyń jetispeýshiligi problemasyn sheshýge baǵyttalǵan. Elektrondy agrarlyq qolhattardy engizý elektrondy astyq qolhatyn iske qosý baǵytyndaǵy ońtaıly tájirıbe negizinde atqarylady», - dedi S. Zvolskıı.
Onyń sózine qaraǵanda, zań jobasynda emıssııalyq emes boryshqorlyq baǵaly qaǵazdar shyǵarýǵa fermerlerdiń quqyǵy qarastyrylǵan. Bul óz kezeginde fermerlerge óziniń ónimin aldyn ala satýǵa jáne arzan aqshany tartýǵa jol ashady. Osy oraıda bul qadam qarjyny bankterden bólek, basqa da kózderden tartý múmkin beredi.
Depýtattyń atap ótýinshe, elektrondy agrarlyq qolhattardy engizý 2021 jylǵa qaraı Qazaqstannyń aýal sharýashylyǵy salasyna 100 mlrd teńge shamasynda qarjylaı jáne taýarlyq somany tartýǵa jaǵdaı jasaıdy.
