Agrarlyq JOO-larda shákirtaqy somasyn arttyrý kerek - depýtat
ASTANA. KAZINFORM — Májilis depýtaty Temir Qyryqbaev Premer-Mınıstrdiń orynbasary – Ulttyq ekonomıka mınıstri Serik Jumanǵarınge agroónerkásiptik keshen salasyn bilikti mamandarmen qamtamasyz etý týraly depýtattyq saýal joldady.
- Azyq-túlik qaýipsizdigin qamtamasyz etý – Qazaqstannyń strategııalyq mindeti, ol otandyq aýyl sharýashylyǵyn damytý, ónimdi jetkizý logıstıkasyn ońtaılandyrý jáne ımportqa táýeldilikti azaıtý arqyly sheshiledi. Turaqty óndiris pen sapaly ónim halyqtyń ál-aýqatyn arttyrýdyń basty kepili bolýda. Búginde jahandyq azyq-túlik daǵdarysy men halyq sanynyń ósýi jaǵdaıynda ózin-ózi qamtamasyz etý táýelsizdik pen turaqtylyqtyń mańyzdy faktoryna aınalýda. Parlament Májilisiniń depýtaty retinde jyl basynda óńirlerge baryp, saılaýshylarmen kezdesý ótkizip, aýyl-aımaqtardaǵy ózekti máselelermen tanystym. Aýyldaǵy sharýalar agrosektordaǵy eń ózekti ári kúrdeli máseleniń biri retinde kadr tapshylyǵyn atap ótti. Ásirese, malshy, saýynshy, mehanızator, veterınar, agronom, zootehnık sekildi mamandardyń jetispeýshiligi bar ekenin jetkizdi. Bul jaǵdaı aýyldyq jerlerdegi turmys deńgeıiniń tómendigimen, eńbekaqy mólsheriniń jetkiliksizdigimen jáne áleýmettik qoldaý tetiginiń álsizdigimen tikeleı baılanysty, - dedi T. Qyryqbaev Májilistiń jalpy otyrysynda.
Onyń sózine qaraǵanda, bul júıeli máseleler Joǵary aýdıtorlyq palata esebinde de aıqyn kórinis tapqan. Atap aıtqanda, zeınetaqy jarnalary aýdarylmaǵan azamattardyń sanynyń aıtarlyqtaı kóp bolýy nazar aýdartady. Bul jaǵdaı eńbek zańnamasynyń saqtalý deńgeıinde eleýli olqylyqtar bar ekenin kórsetedi. Mundaı úrdis jumys berýshiler tarapynan mindettemelerdiń tolyq oryndalmaýy nemese baqylaý tetikteriniń álsizdigimen baılanysty bolýy múmkin.
- Osyǵan baılanysty aýyl sharýashylyǵy salasyna mamandardy tartý jáne olardy turaqtandyrý maqsatynda keshendi ári júıeli ózgerister engizý qajet dep esepteımin. Osyǵan oraı kelesi máselelerdi sheshýdi suraımyn. Brinshiden, aýyl sharýashylyǵy qyzmetkerleriniń eńbekaqysyn arttyrý maqsatynda Úkimet tarapynan qosymsha tólemder qarastyryp, jergilikti bıýdjet esebinen arnaıy sýbsıdııalaý baǵdarlamasyn engizý mańyzdy. Budan bólek, osy salada eńbek etetin azamattar úshin jeke tabys salyǵynyń tómendetilgen mólsherlemesin belgileýdi, sondaı-aq agrarlyq kolledjder men joǵary oqý oryndarynda maqsatty granttar sanyn ulǵaıtyp, shákirtaqy kólemin arttyrýdy usynamyn, - dedi depýtat.
Eske salsaq, Aýyl sharýashylyǵy mınıstrligi aýyldaǵy veterınarlardyń jalaqysy ósetinin habarlaǵan edi.
