Agrarlyq sektorǵa joǵary bilikti maman daıarlaý máselesi talqylandy
ASTANA. KAZINFORM – Aýyl sharýashylyǵy mınıstri Aıdarbek Saparov Arızona ýnıversıtetiniń prezıdenti Sýresh Garımellamen kezdesti.
Yntymaqtastyqtyń keleshegin talqylaýǵa Ǵylym jáne joǵary bilim mınıstri Saıasat Nurbek, Aýyl sharýashylyǵy mınıstrliginiń beıindi departamentteriniń basshylary jáne Ulttyq agrarlyq ǵylymı-bilim berý ortalyǵynyń (UAǴBO) ókilderi qatysty.
Aıdarbek Saparov mınıstrliktiń Arızona ýnıversıtetiniń Qazaqstanda halyqaralyq akademııalyq standarttarǵa saı mamandar daıarlaýǵa qosyp otyrǵan úlesin joǵary baǵalaıtynyn atap ótti. Sondaı-aq jetekshi sheteldik joǵary oqý oryndarymen áriptestikti damytý otandyq agroónerkásiptik keshendi jańǵyrtýdyń mańyzdy tetikteriniń biri ekenin aıtty.
— Agroónerkásiptik keshen — elimiz ekonomıkasynyń negizgi salalarynyń biri. Búginde eńbek ónimdiligin arttyrý, zamanaýı tehnologııalardy engizý, klımattyń ózgerýine beıimdelý jáne azyq-túlik qaýipsizdigin qamtamasyz etý sııaqty aýqymdy mindetter tur. Bul mindetterdi agrarlyq ǵylymdy damytý men joǵary bilikti kadrlar daıarlamaıynsha júzege asyrý múmkin emes, — dedi mınıstr.
Óz kezeginde Sýresh Garımella ýnıversıtettiń Qazaqstanmen ǵylymı jáne akademııalyq áriptestikti odan ári keńeıtýge múddeli ekenin jetkizdi. Onyń aıtýynsha, zamanaýı bilim berý baǵdarlamalaryn engizýge, birlesken ǵylymı zertteýler júrgizýge, sondaı-aq M. Qozybaev atyndaǵy Soltústik Qazaqstan ýnıversıteti men agrarlyq ǵylym uıymdarynyń bazasynda birlesken jobalardy iske asyrýǵa erekshe nazar aýdarylady.
Aıdarbek Saparov mınıstrlik tarapynan birlesken bastamalardy iske asyratyn negizgi uıym retinde quramyna ǵylymı-zertteý ınstıtýttary, tájirıbe stantsııalary jáne elimizdegi aýyl sharýashylyǵy mamandyqtary boıynsha bilim alatyn stýdentterdiń shamamen 70 paıyzyn qamtıtyn úsh mamandandyrylǵan agrarlyq joǵary oqý orny kiretin Ulttyq agrarlyq ǵylymı-bilim berý ortalyǵy aıqyndalǵanyn habarlady.
Qazaqstan tarapy sý resýrstaryn basqarý, bıotehnologııalar, tsıfrlyq aýyl sharýashylyǵy jáne veterınarııa salalarynda Arızona ýnıversıtetiniń ozyq tájirıbesin engizýge múddeli ekenin bildirdi.
Yntymaqtastyqtyń basym baǵyttary retinde akademııalyq utqyrlyq baǵdarlamalaryn damytý, jas ǵalymdar men oqytýshylardyń taǵylymdamalaryn uıymdastyrý, sondaı-aq magıstratýra men doktorantýra deńgeıindegi birlesken bilim berý baǵdarlamalaryn iske asyrý belgilendi.
Kezdesý barysynda taraptar ǵylym, bilim berý jáne tehnologııalar transferi salalaryndaǵy yntymaqtastyqty damytýǵa qatysty amerıkalyq delegatsııanyń usynystaryn egjeı-tegjeıli talqylady.
Aıta ketelik AÓK-ke quıylǵan qarjy ekonomıkalyq ósimge jol ashqan edi.
