Agrarlyq sektorda sý únemdeý tehnologııalary kúsheıtildi
ASTANA. KAZINFORM - Maqta alqabynyń jalpy kólemi 162,4 myń gektar deńgeıinde saqtalǵanymen, sýarý tásilderi edáýir ózgerdi. Bul týraly AShM baspasóz qyzmeti habarlady.
Kóktemgi dala jumystaryna daıyndyq barysynda agrarlyq sektorda sý tutynýdy azaıtý máselesine aıryqsha mán berilip keledi. Memlekettik organdar men óńirler birlesip júzege asyryp jatqan keshendi sharalar óndiris kólemi men ónimdilikke nuqsan keltirmeı, sý resýrstaryn utymdy paıdalanýǵa baǵyttalǵan.
Byltyr jeltoqsan aıynda Qyzylorda, Túrkistan jáne Jambyl oblystarynyń sharýalarymen arnaıy jıyn ótkizilip, sý kóp qajet etetin daqyldar – kúrish pen maqta egistikterin qysqartý máselesi qaralǵan bolatyn. Bul jumys bıylǵy jyldyń qańtar aıynda Almaty jáne Jetisý oblystarynda jalǵasty. Nátıjesinde fermerlerge boljamdy sý qorlaryn eskere otyryp belgilengen sý paıdalaný shekteri jetkizildi.
Qazirgi tańda egis alqaptary 2026 jylǵa arnalǵan belgilengen shekterge sáıkes bekitildi. Atap aıtqanda, kúrish egistigi 20,2 myń gektarǵa qysqartyldy. Onyń ishinde Qyzylorda oblysynda – 10,9 myń, Túrkistan oblysynda – 7,4 myń, Almaty oblysynda – 1,9 myń gektarǵa azaıdy.
Sonymen qatar sý paıdalanýdyń tıimdiligin arttyrý baǵytynda júıeli sharalar qabyldanyp jatyr.
Maqta alqabynyń jalpy kólemi 162,4 myń gektar deńgeıinde saqtalǵanymen, sýarý tásilderi edáýir ózgerdi. Tamshylatyp sýarý alańy 29,8 myń gektarǵa ulǵaıyp, 79,8 myń gektarǵa jetti. Al dástúrli sýarý ádisteri 12 myń gektarǵa qysqaryp, 82,6 myń gektardy qurady. Bul óz kezeginde sý shyǵynyn azaıtyp, ónimdilikti arttyrýǵa múmkindik beredi.
Vegetatsııalyq kezeńniń ótý barysy Aýyl sharýashylyǵy, Sý resýrstary jáne ırrıgatsııa mınıstrlikteriniń, sondaı-aq óńirlik ákimdikterdiń turaqty baqylaýynda. Sý jetkiliktiligi men egis jaǵdaıyna jedel monıtorıng júrgizilip otyr.
Bıylǵy jyly jalpy egis alqaby shamamen 23,8 mln gektar, bul ótken jylmen salystyrǵanda 180 myń gektarǵa artyq. Egis qurylymyn ártaraptandyrý jumystary jalǵasyp jatyr.
Bıdaı alqaby 125 myń gektarǵa qysqaryp, 12,1 mln gektar boldy. Al ónimdiligi joǵary ári sý az qajet etetin daqyldardyń úlesi artty. Máselen, maıly daqyldar 4 mln gektardan asady (+55 myń ga), mal azyqtyq daqyldar 3,3 mln gektarǵa jetedi (+237 myń ga), uıymdasqan sharýashylyqtardaǵy kartop alqaby 94,5 myń gektarǵa deıin ulǵaıtyldy.
Ońtústik óńirlerde egis naýqany bastalyp, 202 myń gektar jerge egin egildi. Onyń ishinde 113,6 myń gektary – dándi daqyldar, 32,3 myń gektary – mal azyqtyq daqyldar, 23,7 myń gektary – maıly daqyldar, al 32,1 myń gektary – kókónis, baqsha daqyldary men kartop boldy. Qalǵan óńirlerde daıyndyq jumystary qarqyndy júrgizilip jatyr. Tuqym qory tekserilip, dızel otyny men mıneraldy tyńaıtqyshtar jetkizilip otyr.
Tuqym qorynyń kólemi 2,3 mln tonna. Sapasy joǵary talaptarǵa saı. Tyńaıtqysh engizý kólemi de osy deńgeıde josparlanǵan.
Dala jumystaryn ýaqytyly júrgizý maqsatynda agrarshylarǵa 402 myń tonna jeńildetilgen dızel otyny bólindi.
Aýyl sharýashylyǵy tehnıkasy 90%-ǵa deıin daıyn. Sharýashylyqtarda 133,9 myń traktor, 5,6 myńǵa jýyq joǵary ónimdi egis kesheni, 71,4 myń sepkish jáne 188,5 myń topyraq óńdeý quraldary bar.
Jalpy alǵanda, egis qurylymyn ońtaılandyrý, sý únemdeý tehnologııalaryn engizý jáne sý paıdalaný shekterin qatań saqtaý sý resýrstaryna túsetin júktemeni azaıtyp qana qoımaı, turaqty ári mol ónim alýdyń kepili sanalady.
Jalpy aıtqanda, kóktemgi egis naýqanynyń barysy Úkimettiń turaqty baqylaýynda.
Aıta ketelik Túrkistandyq dıqandar Reseıge erte pisetin qyryqqabat ónimin eksporttaǵan edi.
