Agrarlyq saladaǵy negizgi kapıtalǵa quıylǵan ınvestıtsııa 790 mlrd teńgege jetti
ASTANA. KAZINFORM — Sońǵy úsh jylda eńbek ónimdiligi 37,3 paıyzǵa artty. Bul týraly QR Prezıdentiniń kómekshisi — Baspasóz hatshysy Rýslan Jeldibaı óziniń Telegram arnasynda habarlady.
Onyń aıtýynsha, agrarlyq salany damytý — memlekettik saıasattyń strategııalyq basymdyqtarynyń biri. Prezıdent atap ótkendeı, «Aýyl sharýashylyǵyn damytý máselesine aýyl-aımaqtardy, ıaǵnı búkil eldi damytý dep qaraǵan jón».
— Memleket basshysy qarasha aıynda ótken Aýyl sharýashylyǵy eńbekkerleriniń ІІ forýmynda mal sharýashylyǵyn damytý, aýylsharýashylyq jerlerin ońtaıly paıdalaný, sýdyń tıimdiligin arttyrý, ırrıgatsııalyq júıelerdi jańǵyrtý, agroónerkásipti qarjylandyrý tásilderin jetildirý, salany tsıfrlandyrý, ónimdi tereń óńdeý sekildi birqatar negizgi mindetterdi aıqyndady. Jyl basynan beri agrarlyq saladaǵy negizgi kapıtalǵa quıylǵan ınvestıtsııa 20 paıyzǵa ulǵaıyp, 790 mıllıard teńgege jetti. Sońǵy úsh jylda eńbek ónimdiligi 37,3 paıyzǵa artty. Bıyl elimizde alǵash ret aýyl sharýashylyǵyna jeńildikpen berilgen nesıe kólemi 1 trıllıon teńgeden asty, — dep jazdy Rýslan Jeldibaı.
Búginde aýylsharýashylyq tehnıkalaryna ishki suranystyń 90 paıyzyn otandyq óndiris qamtamasyz etedi. Elimizdegi 10 zaýytta álemge belgili brendterdiń 19 túrli tehnıkasy qurastyrylady.
Agroónerkásip ónimderi 70 elge eksporttalady. Onyń jalpy quny 5 mıllıard dollardan asady.
Bıyl dıqandarymyz 27 mıllıon tonna astyq jınady. El qambasyn toltyrýǵa barlyq óńir atsalysty.
Budan buryn elimizde jańa baǵyttar ashylyp, halyqaralyq áýe reısteri kóbeıgenin jazǵan edik.